bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


14/06/2011

Ant fatu in Alcalà de Henares su cungressu de s'Assòtziu de Linguìstica e Filologia de s'Amèrica Latina

Ant faeddadu finas de sa situatzione de sas limbas minoritàrias

S' Universidade de Alcalá de Henares (Ispagna) at acollidu sa de sèighi editziones  de su Cungressu Internatzionale de s'  Asociación de Lingüística Y Filología de América Latina (ALFAL).

Custu cungressu est istadu un'ocasione pro arresonare de sos problemas de su limbàgiu chi prus  interessant sos istudiosos, pro fàghere connòschere  tendèntzias teòricas o metodològicas noas in sas dissiplinas chi pertocant  sos  sistemas linguìsticos, pro cuncambiare opiniones a propòsitu de sas polìticas linguìsticas.

Ma sa finalidade est istada finas sa de esaminare sos  fenòmenos produidos dae su cuntatu linguìsticu  de sos pòpulos, connòschere sa situatzione de sas limbas minoritàrias, cunsiderare sas ripercussiones  de sa globalizatzione  in sas limbas, ghetare pontes intre sas  iscobertas e sos progressos de sa linguìstica e s'insinnamentu de sas limbas.

In sas bator dies de su cungressu  ant tratadu sos aspetos de sas dimensiones mùltiplas   de su limbàgiu: anàlisi de istruturas linguìsticas, pragmàtica e anàlisi  de su discursu, dialetología e sotziulinguìstica, psicolinguìstica e linguìstica  clìnica, filología e linguìstica istòrica,linguìstica   amerìndia, linguìstica  aplicada.In prus, b'at àpidu laboratòrios,  sessiones de comunicatziones orales e duas cunferèntzias  plenàrias fatas dae  ispetzialistas.

S' ALFAL  l'ant fundada in Tzile in su 1964. Est un'istitutzione autònoma, afiliada a s' UNESCO tràmite sa  Federatzione Internatzionale de Limbas  e Literaduras Modernas.


#Sarvadore Serra

» in segus