EVENTOS-ATZIONES

Un'addòviu pro ammentare  una figura de importu mannu pro sa cultura nostra. S’Omnium cummèmorat a Rafael Caria. S'apuntamentu est custa chenàbura chi benit, a sas ses e mesu de sero, in sa sala de s'Ufìtziu Informatziones Turìsticas de S'Alighera.

Mortu tres annos a como, isse at dedicadu su prus de sa vida sua a s’impinnu polìticu e culturale pro sa tutela e su promovimentu de s’identidade catalana in S’Alighera

Autore de istùdios e publicatziones medas  de caràtere istòricu, linguìsticu e poèticu, e finas ideòlogu  e leader de su movimentu Sardenya y Llibertat, in calidade de  dipendente de s'Alitalia est istadu artèfitze  de atziones estremorosas, comente sos annùntzios in catalanu e in sardu fatos in s'aeroportu  de S'Alighera  in s'agabbu de sos annos 70, cosa chi nch'at giutu sa chistione de sa tutela de sa minoria catalana de S'Alighera a sa  ribalta istatale e internatzionale.

Ant a leare parte in sa cunferèntzia  Pier Luigi Alvau, chi at cumpartzidu  cun  Rafael Caria su bonu de su caminu  polìticu e culturale  e chi galu oe est sighende in s'impinnu suo valorosu  de promotore culturale. Ma b'at finas giòvanos  aligheresos e catalanos  comente  Noëlia Motlló Boirach, chi  at collaboradu cun  Rafael Caria in sa realizatzione de su  Ditzionàriu  Etimològicu  aligheresu, òpera abbarrada sena cròmpida, Elisabetta Dettori, chi at cumpartzidu  unas cantas initziativas culturales,  e Marcello Farinelli,istudiosu de istòria  cuntemporànea e autore de un'istùdiu  in limba  catalana a propòsitu de su fascismu in S'Alighera. Sa presèntzia de sos giòvanos aligheresos e catalanos est sinnificativa  pro mustrare s'atualidade  de sos istùdios e de s'impinnu polìticu  e culturale profusu dae Rafael Caria e sa grandu opportundade  econòmica e culturale chi tenet su  catalanu de S'Alighera  pro sas levas noas.