bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


02/05/2011

Addòviu de indipendentistas in Casteddu

L'at ammaniadu su Psd'Az

Reconnoschimentu de sos pòpulos sena Istadu e  rapresentàntzia issoro in Europa. Sunt sos duos obietivos mannos de sos partidos indipendentistas e natzionalitàrios chi in custas dies si sunt riunidos in Casteddu pro faeddare de soverania. S'addòviu l'at ammaniadu su Psd'Az pro festare sos noranta annos suos de vida.

"Tocat a fàghere una batalla ùnica pro s'autodeterminatzione - at naradu su  presidente de su Psd'Az, Giagu Sanna - su passu beniente  pro nois  no est a cròmpere a su collègiu  ùnicu pro s'ìsula pro espressare  una rapresentàntzia in su  Parlamentu Europeu, ma a ativare su percursu  conclusivu, giai reconnotu pro Südtirol e Badde de Aosta, chi nos bidat  portadores  de interessos de su   pòpulu sardu comente minoria linguìstica".

Ammentende sa cofundatzione de s'Alliàntzia lìbera Europa (Ale), Sanna at craridu chi su cunfrontu cun sas realidades  corsicana, basca, fiamminga, galitziana, vèneta, baddeostana e sudtirolesa "nos permitet  de nos cunfrontare  cun sos àteros chi vivent  sa situatzione nostra matessi  e de ipotizare percursos sìmiles a sos chi ant adotadu cussas regiones  pro superare, a bias, sos matessi problemas".

Su presidente de s'Ale, Eric Defoort, at naradu chi "cun su printzìpiu de autodeterminatzione de sos pòpulos cherimus fraigare sa democratzia dae bassu cara a artu, puntende in sas netzessidades e in sos bisòngios  de sas pessones, in unu protzessu chi s'inserit intre sa globalizatzione e sa delocalizatzione e chi avvalorat sos issèberos locales pro difèndere sas peculiaridades culturales e pro  isvilupare sas potentzialidades econòmicas de cada realidade".

In s'addòviu s'Ale at finas faeddadu de sas prospetivas eletorales in tèrmines de alliàntzias. In mesu de s'àteru, at pretzisadu chi sa Lega Nord de Umberto Bossi, chi a sa prima l'aiant ammìtida, dae tempus meda non faghet prus parte de s'organismu.

#Sarvadore Serra

» in segus