bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: EVENTOS-ATZIONES
cumpartzi custa noa cun sos amigos tuos invia mail stampa

EVENTOS-ATZIONES


07/04/2011

Sa formatzione de sos insinnantes in limba sarda

Cumintzat cras in Casteddu su progetu FILS

Cumintzat cras, chenàbura oto de abrile, su progetu  FILS, pro sa Formatzione de Insinnantes in Limba Sarda. Si cumintzat  cun unu laboratòriu  de espertos, promòvidu dae s'Assessoradu  Regionale de s'Istrutzione Pùblica, Benes Culturales, Informatzione, Ispetàculu e Isport, chi s'ant a dare apuntamentu  in s'albergu  Regina Margherita pro una die intensa de  cuncàmbiu e istùdios chi at a èssere ùtile in vista de sa progetatzione  de  cursos di formatzione isetados oramai dae deghinas de annos

Sa Regione, de acordu  cun sa  Diretzione Iscolàstica Regionale, at incarrigadu sa facultade de Lìteras  e Filosofia de s'Universidade  de Casteddu  de  formare unu nùmeru mannu  de dotzentes  chi si chèrgiant  impinnare in sa trasmissione intergeneratzionale in sa didàtica de sa limba  de identidade istòrica  de s'ìsula. Su progetu at a tènnere sa durada  de unu triènniu e si proponet de interessare  a su nessi  200 insinnantes de  rolu de sas iscolas de cada  òrdine e gradu e de diferentes deghinas de  espertos  esternos. Su laboratòriu  organizadu pro chenàbura  tenet pròpiu sa finalidade de isseberare  ideas , propostas  operativas  e interventos  pro  orientare in sa mègius manera  sas risorsas investidas  in su mundu de s'iscola  chi est connoschende, comente totus ischint, unu mamentu dramàticu.

"In sa Cunferèntzia  programàtica de pagos meses a como  in Fonne  - at sutaliniadu  s'assessore  de s'Istrutzione Pùblica, Sergio Milia - amus  faeddadu de s'issenàriu  difìtzile de sa chistione linguìstica de s'ìsula nostra e amus propostu unas cantas solutziones in s'àmbitu de  una situatzione econòmica mala de s’istrutzione regionale. So cuntentu  de pòdere nàrrere chi, in pagu tempus, dae sas promissas  semus colende a sos fatos".

Sos traballos ant a cumintzare  a sas 9.00 e prevident, in mesu de s'àteru, sos interventos  de su Diretore Iscolàsticu Regionale Enrico Tocco e de su  prèside de sa facultade de Lìteras  e Filosofia Roberto Coroneo. Ant a sighire  sas relatziones  de Ignazio Putzu e Antonietta Marra de s' Universidade  de Casteddu e de Gabriele Iannaccaro de s'Universidade  de  Milano-Bicocca. Pustis, discussione aberta dae Giampiero Liori de s'Ansass.

In su merie , dae sas  15.00 finas a sas 18.00, b'at  in programa sa discussione cun sos interventos de Giuseppe Corongiu, diretore de su Servìtziu Limba Sarda de sa Regione, Ottavio Marcia, ispetore de sa  Diretzione Isolàstica Regionale, Maria Antonietta Dettori, Giulio Paulis e Maurizio Virdis (Universidade de Casteddu), Luisa Marci Corona (Assòtziu Insinnantes Limbas Istràngias ), Annalisa Flaviani e Filomena Santeufemia (dirigentes  iscolàsticas ), Riccardo Solinas, Antioco Ghiani, Antonello Garau e Francesco Casula espertos  de insinnamentu de sa limba  minoritària in iscola.

#Sarvadore Serra

» in segus