bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


Presentadas in S'Alighera sas pellìculas catalanas prus reghentes

In s’initziativa ant leadu parte sa “Società Umanitaria” de S’Alighera e   sa  Generalitat de Catalunya.

Ant presentadu in S’Alighera, in sa sala de su tzìnema Miramare, in su mese de nadale, sas pellìculas  catalanas prus reghentes. In s’initziativa ant leadu parte sa “Società Umanitaria” de S’Alighera e   sa  Generalitat de Catalunya. Catalunya Cinema  est arribbadu a Sardigna cun bator de sas pellìculas prus interessantes produidas in Catalugna in s’annu 2010, inclùdida Pa Negre (in sa fotografia, un'imàgine de su film), candidada dae pagu a s’Oscar comente mègius òpera de logu istràngiu.

Catalunya Cinema un’initziativa de s’”Institut Català de les Empreses Culturals del Departament de Cultura”, pro aumentare sa visibilidade de sas pellìculas catalanas e fàghere prus mannu su pùblicu de custu tzìnema, in Catalugna e in foras.

“Catalunya Cinema a l’Alguer” est cumintzadu cun sa pellícula Elisa K., de Jordi Cadena e Judith Colell. Ispiradu a unu romanzu famadu, su film contat, ponende·nche tratas de tzìnema isperimentale in una trama prus traditzionale, s’istòria de Elisa, chi a 24 annos bidet bulugiada sa vida sua dae un’ammentu no isetadu  e dolorosu chi nche torrat a cando teniat 11 annos.

Sa de duas est istada una sessione ispetziale a beru. Su protagonista est istadu Pasqual Maragall (sìndigu durante sos Giogos Olìmpicos de Bartzellona 92  e, annos a pustis, presidente de sa Generalitat de Catalugna). Bicicleta, cullera, poma mustrat, cun unu documentàriu, comente custu malàidu istraordinàriu parat fronte a sa batalla sua de cada die contra a s’Alzheimer, chi l’ant dignosticadu in su 2007. 

Su de tres de sos film projetados est istadu Herois de Pau Freixas.  Su film contat s’ùrtima istade chi unu grustu de giovaneddos colant paris, cun sas aventuras, sos amores e sos dolores de conca caraterìsticos de custa  fase de sa vida, in ue  sa pitzinnia cumintzat a lassare logu a s’edade manna. Herois si moet intre cumèdia e drama, e comùnicat cun simplitzidade e sensibilidade una visione mìtica de sa pitzinnia,  chi pro totus, non pro sos prus giòvanos ebbia, at a bènnere male a non si intèndere in empatia. 

Catalunya Cinema est agabbadu cun Pa Negre, de Agustí Villaronga. Sa pellìcula,  ispirada  a su romanzu  omònimu de Emili Teixidor, a pustis de àere triunfadu  in sos Prèmios Goya, est su primu film in limba catalana candidadu a s’Oscar in sa  categoria de su mègius film de logu istràngiu. Ambientadu in sa Catalunya rurale, Pa negre est unu ritratu cumplessu e profundu de sa barbàrie de su  pustis gherra, de sos abusos de sos binchidores e de sa supravivèntzia ispramada de sos bintos. Totu custu,  bidu cun sos ogros de unu piseddu. 

Prus de 1.000 pessones ant assìstidu a sas projetziones, godende·si produtziones tzinematogràficas de calidade, avvaloradas in totu su mundu, e faeddadas in sa limba catalana cumpartzida. Custa partetzipatzione manna cunfirmat chi, in S’Alighera, su catalanu est biu a beru e chi sa cultura catalana, si est originale e de valore, interessat finas sos aligheresos, chi l’intendent comente pròpia.

[dae Eja n. 8  2011]


#Sarvadore Serra

» in segus