bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


21 de Freàrgiu: die internatzionale de sa limba materna

Publicadu dae s'Unesco s'Atlante nou de sas limbas in perìgulu

S'Unesco at presentadu in Parigi su 19 de freàrgiu sa versione eletrònica de s'editzione noa de s'Atlante de sas limbas in perìgulu de su mundu. Si tratat de un'istrumentu numèricu interativu chi cuntenet datos atualizados de prus de 2.500 limbas in perìgulu e s'at a pòdere cumpretare, currègere o atualizare in manera costante gràtzias a sos cuntributos de sos utentes.
S'Atlante, presentadu dies in antis de sa Die internatzionale de sa limba materna, cunsentit de fàghere chircas cunforma a medas critèrios e classìficat sas 2.500 limbas in perìgulu regòllidas cunforma a chimbe grados de vitalidade diferentes: vulneràbile, in perìgulu, in perìgulu mannu, in cunditzione crìtica e estintas (dae su 1950).
Leghende s'Atlante, b'at de si pònnere pessamentu: de sas 6.000 limbas chi esistint in su mundu, prus de 200 si sunt estintas in sas ùrtimas tres generatziones, 585 sunt in cunditzione crìtica, 520 in perìgulu mannu, 632 in perìgulu e 607 in cunditzione de vulnerabilidade.
S'Atlante mustrat chi 199 limbas tenent prus pagu de 10 pessones chi las faeddant e 178 chi tenent unu nùmeru de faedadores chi andat dae 10 a 50. Peus de gosi non podet andare: est in perìgulu sa diversidade de sas culturas chi est fundamentale pro s'echilìbriu de s'umanidade. De seguru sa mundializatzione, o comente narant àteros sa globalizatziones tenet curpas mannnas in custu protzessu de omologatzione chi non rispetat peruna limba e perunu pòpulu.
E su sardu? Est classificadu "in perìgulu", ma non comente sardu ma comente logudoresu e campidanesu. S'Unesco sighit in custa atzione de disinformazione linguìstica chi nos faghet dannu, sighende una classificatzione dialetològica betza, impretzisa, ideològica. Chie bidet custu Atlante podet pessare a beru chi su sardu non siat una limba reale ca sa limba reale "sunt" pro s'Unesco su logudoresu e su campidanesu, chi sunt petzi un'astratzione chi non servit a nudda.
Custa classificatzione est finas discriminatòria ca, si est basada in sos dialetòlogos, tando no esistit mancu su chi s'Unesco classìficat corsicanu, friulanu, ladinu! Ma, a dolu mannu pro nois est una classificatzione chi Unesco leat dae Ethnologue, chi faghet su matessi dannu. S'Unesco at a dèvere cambiare custa classificatzione dannosa.
Pro fàghere a manera chi sa situatzione de sa limba sarda non peoret bi cheret una polìtica linguìstica urgente. Cada die chi colat sena fàghere cosa, est semper peus.

#Sarvadore Serra

» in segus