bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


AT CUNGIADU "GALICIA HOXE", S'ÙNICU CUOTIDIANU IN GALITZIANU

Un'efetu de sa "gallegofobia" de su guvernu cunservadore de Nuñez Feijoo?

Dae cando est presidente de su Guvernu de Galìtzia Alberto Nuñez Feijoo, su 17 de abrile de su 2009, podimus nàrrere chi sunt cumintzados tempos malos pro sa limba galitziana. Su Partidu Populare chi est guvernende como, difatis, est contràriu a sa polìtica linguìstica sighida in antis dae sa Xunta guvernada dae una coalitzione in ue fiat presente una parte natzionalista galitziana forte. Cun s'iscusa de aplicare a beru una polìtica de bilinguismu, "Feijoo est in cherta de nche catzare s'ufitzialidade de su galitzianu", comente narat su presidente de "A Mesa" Carlos Callón, chi gherrat pro sa normalizatzione de su galitzianu.
Un'àteru organismu in defensa de su galitzianu "Queremos Galego" in unu Manifestu de su 17 de maju faghet un'elencu particularizadu de totu sos atacos de su guvernu a sa limba galitziana: sa chi in medas mutint como "gallegofobia".

In custu "clima" malu pro sa limba pròpia de Galìtzia, chi agatamus finas pro su catalanu e su bascu in Catalugna e Paisu Bascu, devimus cunsiderare finas s'iscumparta unu mese a como de s'ùnicu cuotidianu in limba galega in pabiru: GALICIA HOXE. S'ùrtimu nùmeru in pabiru est essidu su 28 de làmpadas. E custu, a pustis chi, s'annu passadu, ant cungiadu su cuotidianu digitale prus connotu, VIEIROS, e su setimanale istòricu A NOSA TERRA.

In GH bi traballaiant 19 pessones, su prus giòvanos, cun ideas progressistas, in defensa de sa cultura galitziana e de s'autoguvernu. Como bi nd'at abbarradu petzi duos de giornalistas, chi mantenent aberta sa versione internet. Ma non s'ischit finas a cando.

Galicia Hoxe fíat essidu a campu sa prima iba su 17 de maju de su 2003. Fiat s'erede diretu de O Correo Galego, su primu cuotidianu iscritu totu in gallego, nàschidu su 6 de ghennàrgiu de su 1994, gràtzias a sa voluntadede de sa Xunta cumandada tando dae Manuel Fraga, ex ministru de Francisco Franco.

In medas, urtimamente, ant acusadu su guvernu de Feijoo de nche catzare sos agiudos a sos mèdios informativos in galitzianu, cando chi su matessi guvernu sighit a agiuare sos grupos informativos mannos e… cunservadores, in castiglianu.

Duncas, no est in Sardigna ebbia chi sos contràrios a sas limbas natzionales sunt boghende a campu sas armas issoro.

#Diegu Corràine

» in segus