bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


Una pitzoca australiana e s'euskera

At bogadu a campu unu giogu in internèt  pro sa limba basca, in ue sos chi bi leant parte formant unu grupu musicale

Sos giòvanos de Euskadi connoschent  s' euskera ma l'impitant pagu. Un'australiana, Philippa Nicole Barr, chi non connsochet  sa limba basca, los at a cumbìnchere a l'impreare  de prus cun unu  videogiogu de partes in  internèt in ue sa mùsica tenet  un'importu mannu a beru.

Custa giòvana  at bintu  unu cuncursu internatzionale,  ammaniadu dae s'agentzia comunale de Bilbao Lan Ekintza paris cun unas cantas comunas de  sa provìntzia e cun sa mankomunitateak de Uribe Kosta. Custu disinnu  "originale e nou" s'at a cumpletare  cun s'agiudu  de giòvanos, tècnicos e artistas in sos noe meses chi benint.

In un'addòviu chi ant fatu in custas dies coladas, su sìndigu de Getxo, Imanol Landa, acumpangiadu dae rapresentantes de sas comunas  de Leioa e Erandio, e de sa mankomunitateak, at presentadu su progetu nou chi faghet parte de s'initziativa  Ipar Uribe pro agiuare s'impreu de s' euskera dae bandas de sos giòvanos, resurtadu de unu cuncursu de ideas fatu in totu su mundu cun s'impresa Conexiones Improbables. "No est sa prima bia chi nos agiuamus a pare pro dare impulsu a s'euskera. E custu traballu at a sighire in su tempus venidore", at agiuntu Landa.

A su cuncursu sunt arribbadas 27 ideas de diferentes partes de su mundu, e sete sunt istados sos  finalistas. In fines, at bintu su progetu de Philippa Nicole Barr, un'australiana chi at istudiadu  antropología in Sidney.

Barr, chi tenet esperièntzia de traballu cun sas comunidades aborìgenas de su logu suo, proponet de fàghere unu videogiogu de partes in ue sos chi bi leant parte  devent formare  unu grupu musicale, cun sas mùsicas, sos testos e totu su restu. "Si tratat  de creare cuntenutos e un'istòria,  animende sos giòvanos  a utilizare s'euskera", at agiuntu. S'australiana proponet de pònnere sas tecnologias noas e sa mùsica pro agiuare sos idiomas minorizados. A propòsitu de su bascu, issa at agiuntu chi "est una limba misteriosa a beru, proa de sa diversidade  de s' Europa e de s'istòria sua",


#Sarvadore Serra

» in segus