bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


S'Unione Europea finàntziat cursos de catalanu pro sos istudentes

Si tratat de unu programa ispetzìficu pro promòvere sas limbas  minoritàrias

Su segretàriu esecutivu  de sa Xarxa Vives, Ignasi Casadesús, at fatu ischire  in un'addòviu cun sos giornalistas  in Bartzellona chi sos  957 istudentes chi ant pedidu  de istudiare catalanu  costituint un'incrementu de su  43% cunforma a s'annu coladu.

In sa presentada  de custos datos sunt intervènnidos  finas su segretàriu de Universidades de la Generalitat, Antoni Castellà,  su  presidente de sa  Xarxa Vives e retore de sa Universidad Politécnica de Cataluña, Antoni Giró, e su presidente de sa setzione filològica de su Institut d'Estudis Catalans, Isidor Marí.

Petzi 200 de sos prus de  900 chi l'ant pedidu  ant a pòdere leare parte  in sos cursos de catalanu  finantziados dae s' Unione Europea cun unu  programa ispetzìficu de promovimentu de sas limbas  minoritàrias (EILC), chi  in s'annu 2009 b'ant agiuntu  su catalanu  e su valentzianu.

Custu est su segundu annu chi sa  UE finàntziat custos cursos, chi ant tentu  un'agasàgiu bonu a beru in mesu de sos giòvanos  europeos chi sighint  istùdios de Erasmus in calicuna de sas 21 universidades de sa regione Vives, chi at acollidu   unos 10.000 iscolanos in su cursu 2010-2011, cunforma a datos de sa Xarxa.

Su segretàriu  de Universidades, Antoni Castellà, at naradu  chi sa dimanda manna de custos cursos de catalanu  "est un'argumentu in prus " in dae in antis de sa UE pro reclamare s'ufitzialidade  de sa limba catalana, finas leende in  cunsideru  su dibàtidu  a pitzu de s'intrada  de sa Croàtzia in s' Unione.

Por parte sua, Isidor Marí, de su IEC, at postu in craru  chi custos datos isfaulàrgiant sos chi, in campos diferentes, bident su catalanu comente un'ostàculu.

In totu, comente at naradu Casadesús, sa UE cuntzedet 100.000 de èuros pro custos  cursos e nde finàntziat cada unu  cun 6.200 de èuros.

Sa Xarxa Vives est una prataforma creada dae 21 universidades de limba  catalana, chi tenet comente missione  sa de promòvere  sa collaboratzione interuniversitària e s'interatzione  cun sa sotziedade.

In mesu de àteru, at fatu nàschere  sa prima ghia multilìngue in lìnia  de sos istùdios  de sos 21 tzentros universitàrios suos, unu programa transfrontaleri  (Cultur Pro) chi punnat  a s'inserimentu professionale  pro mèdiu de sa  limba e de sa  cultura professionales, e unu portale de referèntzia pro sos istudiodos, cun informatziones subra de sos  programas de finantziamentu.


#Sarvadore Serra

» in segus