bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


Un'ursitu  chi faeddat in gaèlicu a sos pitzinnos iscotzesos

Non diat èssere malu a fàghere una cosa gasi finas in sardu.

Un'ursitu de giogu geniosu e galanu, chi imparat a sos pitzinnos 33 paràulas in gaèlicu, at a èssere unu donu de Pasca de Nadale, ocannu, in Iscòtzia.

Lu ponent a bèndere in sas butegas dae su mese de santandria.

Sa cosa interessat totu sas mamas e sos babbos   iscotzesos chi cherent cumintzare a imparare su gaèlicu a sos figigheddos issoro.

Ma, comente funtzionat? bastat a incarcare sos pulsantes chi b'at in origras, brancas e matza pro intèndere s'ursitu faeddende de colores, nùmeros e formas in gaèlicu.

Custu giogu l'at realizadu sa fàbrica pro pitzinnos Acair Limited,  chi at otentu unu finantziamentu dae Bòrd na Gàidhlig (una "quango", est a nàrrere una "quasi-autonomous non-governmental organisation" incarrigada dae su guvernu iscotzesu de fàghere polìtica linguìstica in gaèlicu)

Narat Agnes Rennie, capu esecutivu de Acair: “Custa est una novidade pro nois, e semus bidende de distribuire s'ursitu chi faeddat in sas butegas in tempus pro Pasca de Nadale. Sas paràulas sunt sas prus comunas pro inditare  sos nùmeros, sos colores e sas formas; a un'ala ant a èssere ùtiles pro babbos e mamas, a s'àtera ant a èssere ispassiosas pro sos pitzinnos. Semus giai faeddende, cun sos sòtzios nostros in Irlanda, de sa possibilidade de fàghere libros e cartones animados  chi tèngiant comente protagonista s'ursitu chi faeddat! ”

Su responsàbile de s'istrutzione in su Bord na Gàidhlig, Mary MacMillan, agiunghet: “Istùdios sientìficos ant mustradu chi, a animare sos pitzinnos a imparare limbas noas,  agiuat su potentziale issoro de aprendimentu. Nois pessamus finas chi, a imparare una limba a giòvanos, podet èssere una cosa ispassiosa, e semus cuntentos de assìstere Acair in sa creatzione de custu giogu interativu nou  pro agiuare sos pitzinnos iscotzesos a imparare su gaèlicu.

S'idea no est mala. E non diat èssere malu a fàghere una cosa gasi finas pro su sardu.


#Sarvadore Serra

» in segus