bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


Sa Lis est una  limba, e comente tale cheret tutelada

Li narat s'assòtziu Vedo Voci

Sa Càmera de sos deputados italiana  aprovet su  Ddl 831 chi at tentu giai  su votu in favore  de su Senadu  su sèighi de martzu; sa Lingua italiana dei segni (Lis) siat reconnota comente limba,  cunforma a su chi disponet giai  sa Carta europea de sas limbas  regionales  o minoritàrias (1992);  siat difusu  s'impreu de  tecnologias  didàticas, informàticas, sientìficas e mèigas; sos chi issèberant sa Lis tèngiant deretu a s'integratzione sotziale prena. Est su chi pedit s'assòtziu  Vedo Voci in una petitzione populare.

Promovende una campagna de informatzione e sensibilizatzione, s'assòtziu at postu  in lìnia sa petitzione  e  cheret cumpartzire, cantu prus chi si podet, un'esigèntzia: sa de  fàghere efetiva  sa Cunventzione Onu subra de sos deretos  de sas pessones cun disabilidades in sa parte chi pertocat  su reconnoschimentu  de sa limba de sos sinnos e su promovimentu de sas tecnologias assistidas.

Agiuada finas  dae sa Diretzione didàtica de Cossato (BI), dae sa sede provintziale de Biella de s’Ens (Ente nazionale sordi) e dae sa Comuna de Cossato in sa pessone de su sìndigu, Claudio Corradino, sa petitzione cheret sullitzitare sa cummissione 12 de sa Càmera a s'aprovatzione de su Ddl 831 «Disposizioni per la promozione della piena partecipazione delle persone sorde alla vita collettiva e riconoscimento della lingua dei segni italiana», giai aprovadu, de su restu, dae su Senadu. Una sensibilizatzione chi s'est difundende  in forma capillare unu pagu in totu su territòriu de s'Istadu: sa boghe de Biella e de su fùrriu est comuna  a àteros territòrios medas .

Sa timòria, però, est chi si torret in palas. “In custas dies – iscriet Melania Vaccaro, presidente de s'assòtziu  - sa cummissione  at detzisu  de torrare a esaminare  sa proposta de lege  aprovada, proponende  modìficas  comente sa sustitutzione  de sa ditzione  Lingua dei Segni - Lis, cun  linguaggio mimico gestuale e/o tecnica di comunicazione".  

"Est inutile – agiunghet Melania Vaccaro - a ammentare torra chi sa  Lis usada dae sos surdos  no est petzi unu cumplessu de gestos, ma tenet una gramàtica pretzisa  e presentat totu sos caràteres  morfològicos, gramaticales, sintàticos de cada limba naturale.  Duncas est una limba bera, comente sas àteras limbas faeddadas. Ma b'est s'idea, dae bandas de unos cantos cumponentes de sa cummissione, de declassare sa Lis a meru limbàgiu mìmicu/gestuale".

In sa base de s'arresonamentu  de Vedo Voci  b'est sa demarcatzione  intre sos sinnnificados  de limba e limbàgiu: si, difatis,  su limbàgiu  est unu  sistema de comunicatzione intre emissore e retzidore, sa limba  "est sa realizatzione cuncreta de su limbàgiu, est su sistema gramaticale e lessicale chi, pro mèdiu suo,  sos chi faghent parte de una comunidade  comunicant a pare".  


 


#Sarvadore Serra

» in segus