bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


Pro sa formatzione  in euskera de sos giornalistas venidores

Firmadu un'acordu intre su Guvernu e s'Universidade de Navarra

Su Guvernu   e s'Universidade de Navarra (in sa fotografia) ant firmadu un'acordu  de collaboratzione pro agiuare sa formatzione  in euskera de sos giornalistas venidores. Su testu l'ant sutiscritu su diretore gerente de Euskarabidea, Xabier Azanza Arbizu, sa decana de sa  Facultade de Comunicatzione  de su tzentru  acadèmicu, Mónica Herrero Subías, e su diretore gerente de sa Fundatzione  Impresa-Universidade de Navarra, Ignacio Uría Rodríguez.

S'acordu, firmadu pro su segundu annu  unu infatu de s'àteru, punnat a megiorare e a ismanniare sa formatzione  de sos istudentes universitàrios, potentziende sas pràticas in sos mèdios  de comunicatzione chi impreant su bascu pro sa  difusione  de sos cuntenutos issoro.

Sas pràticas, chi si realizant in manera integrale in custu idioma, sunt diretas a sos alunnos de su de de tres e de su de bator cursos de Comunicatzione  Audiovisiva, Giornalismu e  Publitzidade  e Relatziones Pùblicas chi acrèditant  sa connoschèntzia  de custa limba

Un'àtera de sas finalidades de s'acordu  est a propònnere  a sos mèdios de comunicatzione  chi impreant custu idioma s'oportunidade de cunfiare in professionistas venidores  de su setore.

Su Guvernu de Navarra, pro mèdiu de Euskarabidea, at a aportare in custu segundu annu unu totale de 5.000 de èuros. Sas pràticas las at a gestire  sa  Fundatzione Impresa-Universidade de Navarra, entidade promòvida dae  sa Càmera de Cummèrtziu e Indùstria de Navarra, dae sa Cunfederatzione de Imprendidores de Navarra e dae s' Universidade de Navarra comente  istrumentu de relatzione intre su mundu  imprenditoriale e  su mundu  universitàriu.



#Sarvadore Serra

» in segus