bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


Su patrimòniu literàriu catalanu in rete.

Un'initziativa de  s'Universidade de Lleida

Una parte de su patrimòniu literàriu in limba  catalana, mescamente de autores de sos sèculos  19 e 20, est giai digitalizada gàtzias a sa Càtedra Màrius Torres de s'Universidade de Lleida (in sa fotografia), cun s'obietivu  de agiuare su mantenimentu e sa difusione sua e de nde favorire  s'istùdiu. Su progetu, chi si narat  Corpus Literari Digital, l'ant presentadu de reghente  in su  Centre d'Estudis Catalans de sa Queen Mary University de Londra e l'ant abertu a totus pro mèdiu de internèt.

Su patrimòniu  literàriu digitalizadu est unu cumplessu  de documentos (iscritos, gràficos, sonoros e audiovisivos) chi sunt testimòngios  de s'esistèntzia  de òperas literàrias, est a nàrrere: autògrafos (manuscritos e mecanoscritos), cuadernos de notas e  proas de imprenta, editziones  originales, publicatziones periòdicas, registratziones   cun sa boghe de sos  iscritores e  audiovisivos cun s'imàgine  de sos iscritores.

Sa difusione in rete  de su materiale  si faghet  in pessu s'otenet  su permissu  de sos autores  o de sos eredes issoro e de sas sotziedades chi tenent sos deretos subra de  sas òperas, rispetende  "in manera iscrupolosa" sa propiedade intelletuale.

S'istrutura  de su Corpus

Istruturadu in chimbe setziones (emeroteca, biblioteca, manuscritos, fonoteca e videoteca), su Corpus disponet  de unu chircadore generale pro realizare cada casta de consulta  in intro de sa base de datos, comente, pro nàrrere, localizare , visualizare o ascurtare totu sas versiones  de  su matessi testu  o chircare sa frecuèntzia de una paràula in sa matessi òpera, in totu sas òperas de un'autore o in un'epoca determinada.

Sos resurtados  si mustrant semper in forma de bibliografia e si podent ordinare in cale si siat campu . Gasi etotu, in cada setzione b'at  unu catàlogu de consulta pro tìtulos, in s'emeroteca, e pro autores, in su restu, e b'at finas  blocos de documentos temàticos pro  formadu o provenèntzia.


#Sarvadore Serra

» in segus