bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

Limbas&Natziones: :: ÀTERAS LIMBAS
cumpartzi custa noa cun sos amigos tuos invia mail stampa

ÀTERAS LIMBAS


WIKIPEDIA: 10 ANNOS!

In prus  de 270 limbas, finas in sardu.

S'òpera de riferimentu prus mannu in Internèt, Wikipedia, tzelebrat ocannu su de 10 anniversàrios suo. Jimmy Wales at fundadu Wiquipèdia, «s'entziclopedia de cuntenutu lìberu chi cadaunu podet megiorare», su 15 de su mese de ghennàrgiu de s'annu 2001.

Wikipèdia est un'òpera collaborativa, multilìngue, gratùita. Su 2004 aiat cròmpidu unu millione de artìculos partzidos in 100 limbas diferentes. Como sa Wiquipèdia nche colat sos deghennoe milliones de artìculos in 270 limbas cun s'obietivu de creare «unu mundu in ue cada pessone de sa praneta tengiat atzessu lìberu a totu sa sapièntzia de s'umanidade».

S'annu 2004, pro fàghere a manera de pòdere mantènnere finantziariamente sos servidores chi cuntenent Wiquipèdia, Jimmy Wales est creadu sa Fundatzione Wikimedia. Custa Fundatzione si finàntziat fundamentalmente cun donatziones e si dèdicat a dare suportu a sa comunidade de autores de Wiquipèdia, ma no est propietària de sos cuntenutos suos ne interferit in sa lìnia sua editoriale. Cada versione linguìstica de Wiquipèdia organizat e gestit liberamente sa comunidade sua de autores.

Durante custos 10 annos, sunt nàschidos assòtzios pro dare suportu a sos autores de Wiquipèdia e  pro la promòvere a livellu locale.

B'at finas una Wikipèdia in sardu, cun prus de 2000 artìculos, in ue amus finas collaboradu in su cumintzu. Podiat èssere un'ocasione manna de isvilupu pro sa limba sarda, ma a dolu mannu, sa libertade de WP est istada interpretada dae medas collaboradores sardos comente s'ocasione pro la balcanizare linguisticamente, cunforma a s'ideologia antisarda de chèrrere partzire su sardu in logudoresu, nugoresu, campidanesu!  B'at "finas" sa possibilidade de iscrìere in LSC, ma paret fatu prus chi no àteru pro giustificare sas boghes in LOG, NUG, CAM.

Oramai WP in sardu est "terra de nemos" in ue triunfant sos diferentzialismos e machines peus: ùrtimas mudàntzias, pàgina a sa tzurpa, donaduras! E, pro aumentare sa cunfusione, sunt ponende finas una GSC (Grafia Sarda Comuna!) chi est unu ispropòsitu ortogràficu chi torrat in palas de 20 annos sa chistione de sa limba sarda. Un'imbentu personale detzìdidu baddu dae chie! Est comente a si dare corfos de martzeddu a sa limba (o a butones, comente diat nàrrere calicunu àteru). Làstima!

#Diegu Corràine

» in segus