bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


Sa Catalugna diat pòdere èssere indipendente cunforma a su deretu internatzionale

Lu narat sa Cummissione Europea

A pàrrere de sa Cummissione Europea, non b'at base giurìdica in sos tratados de sa  UE pro permìtere  su reconnoschimentu  de sa setzessione  de una parte de un'Istadu membru  pro mèdiu de una Initziativa Tzitadina Europea. Pro custa resone, at detzìdidu  de no iscrìere a rolu sa dimanda  presentada dae su partidu catalanu Reagrupament.

Su primu de abrile de ocannu, unu Comitadu Tzitadinu  rapresentadu dae su presidente de  Reagrupament, Joan Carretero, aiat presentadu  una dimanda de iscritzione a rolu  de una Initziativa Tzitadina Europea pro fàghere a manera chi s'esseret reconnota  sa sutzessione  comente membru de s'Unione Europea de un'Istadu nou nàschidu dae sa setzessione  democràtica dae un'àteru Istadu membru de sa  UE.

Sa Cummissione Europea at rispostu chi  "negat s'iscritzione a rolu de s'initziativa  proposta ca est, in manera crara,  in foras de su campu de cumpetèntzia  de sa Cummissione  presentare  una proposta relativa a un'atu giurìdicu  chi pertocat  s'aplicatzione de sos Tratados".  A pàrrere de sa Cummissione etotu, "non b'at peruna base giurìdica in sos Tratados de sa  UE chi permitat a una legislatzione segundària  de afrontare sas cunseguèntzias  de sa setzessione de una parte de un'Istadu membru” .

Belle gasi, a su nessi a pàrrere de Reagrupament,  custas paràulas sunt de profetu pro sa Catalugna. Diant dimustrare, difatis,  chi una Catalugna indipendente diat pòdere intrare in su campu de previsione de sa legislatzione internatzionale e diat pòdere èssere un'Istadu membru de sa UE , mancari non cun una ITE. Nche lassat in foras, duncas, s'opinione de totu sos chi narant chi sa Catalugna non diat pòdere fàghre parte de sa UE.

#Sarvadore Serra

» in segus