bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


In Kosovo, sessada sa supervisione internatzionale. Duncas: INDIPENDÈNTZIA

Ma abbarrat una parte serba chi non si cheret assugetare

Dae oe, su 10 de cabudanni, est sessada sa supervisione internatzionale subra de s'indipendèntzia de su Kosovo. Duncas, in custa manera, su Kosovo leat totu sa soverania. Custa est sa sustàntzia de s'annùntziu fatu in Prìstina dae su GIS (Grupu internatzionale de supervisione de su Kosovo).

Cunforma a su chi at naradu su diplomaticu olandesu Peter Feith, capu de s'ufìtziu tzivile ineternatzionale (ICO), cuncruende s'atividade sua, "Sa supervisione subra de s'indipendèntzia de su Kosovo est agabbada".

Su GIS est formadu dae 25 istados chi ant chertu s'indipendèntzia ploclamada dae su guvernu de Prìstina su 17 de freàrgiu de su 2008, includende sa Turchia, sos Istados Unidos e su bonu de sos istados de sa UE (22 de 27).

Sa OTAN at a mantènnere in su territòriu kosovaru  unos 5.000 sordados pro garantire sa seguràntzia, cando chi sa UE at a sighire in sa missione tzivile sua , EULEX, finas a sos primos ses meses de su 2014, pro dare agiudu a su fràigu de un’Istadu de deretu.

Finas a como, 93 istados ant reconnotu s’indipendèntzia de Kosovo. Petzi s’Ispagna, sa Grètzia, Tzipru, s’Islovàchia e sa Romania no l’ant reconnotu.

Su veto de Tzina e Rùssia in su Cussìgiu de Seguràntzia de s’ONU, at impeigadu chi su Kosovo siat ammìntidu comente membru de deretu prenu in s’ONU matessi.

In Washington, su presidente istadunidensu, Barack Obama, at saludadu s’annùntziu, carculende·lu comente una "tapa istòrica”, e at pedidu a su guvernu de Prìstina de fàghere a manera de normalizare sas relatziones suas cun sa Sèrbia, chi si negat galu de reconnòschere sa soverania de sa chi est istada una provìntzia sua.

Un’ostàculu pro sa normalizatzione cumpreta benit finas dae sa negativa de sos Serbos (chi istant in su nord e rapresentant su 11% de su territòriu kosovaru) a èssere integrados in sa repùblica noa. Difatis, su 99,74% de sos Serbos de su nord non si cherent assugetare a s’autoridade de su guvernu kosovaru de majoria albanesa de Prìstina, cunforme a su chi est essidu a campu dae unu referendum non vinculante de su mese de freàrgiu passadu.

Custa est sa “ispina” chi si nche devet tirare s’istadu kosovaru si cheret istabilire una sotziedade de paghe.


#Diegu Corràine

» in segus