bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


Su Tribunale Costitutzionale de Madrid at legalizadu su partidu bascu "SORTU"

A pustis de 15 meses de illegalizatzione. / Prospetivas noas pro sa sinistra patriòtica basca e pro su protzessu de paghe

Su Tribunale Costitutzionale de Madrid at reconnotu e legalizadu oe, su 21 de làmpadas, chi sa illegalizatzione de SORTU [bide in WP] (nàschere in bascu), su partidu nou de sa sinistra basca, vìolat sos deretos de assòtziu polìticu.
Duncas, cheret nàrere chi, a prus de un'annu dae cando est nàschidu, Sortu tenet sa possibilidade de nch'èssere marcadu in su "registru de sos partidos polìticos", sena chi perunu rapresentante suo arrischet de èssere protzessadu o impresonadu.


A pustis de una camera de cussìgiu longa a beru, ses de sos oto magistrados de su Tribunale Costitutzionale ant atzetadu su ricursu presentadu dae Sortu chi, de su restu, tenet comente idea printzipale sa negatzione de cale si siat forma de violèntzia comente mètodu de solutzione de su cunfrontu polìticu. Sende gasi, sa magistradura ispagnola cheriat proibire s'esistèntzia e s'atzione Sortu, incausadu de èssere finas issu "terrorista". Cun s'iscusa chi bastaiat a si presentare in in sas eletziones in una lista patriòtica basca pro èssere cunsideradu in automàticu comente parte de sa "rete de ETA", in custos ùrtimos 10 annos, b'at àpidu chentinas de arrestos e cundenna de militantes e dirigentes polìticos, ecologistas, giornalistas, intelletuales, giòvanos.

In una cunferèntzia de su mundu de s'informatzione, Sortu at manifestadu totu sa cuntentesa sua pro sa legalizatzione sua e s'intrada sua legale in su panorama polìticu bascu, decrarende chi custa novidade detèrminat su superamentu definitivu de su tziclu de illegalizatziones, chi finas a como est istada s'arma de s'istadu ispagnolu pro parare fronte a su cunflitu bascu.
In prus, Sortu sighit decrarende chi est ora chi Euskal Herria (Paisu Bascu) otèngiat su reconnoschimentu natzionale suo e su deretu a s'autodeterminatzione.
A ùrtimu, Sortu at afirmadu chi deretu a ant a cumintzare a si cunfrontare e a detzìdere sas Bases Ideològicas suas, sa Lìnia Polìtica, su Modellu Organizativu e sa Polìtica de Comunicatzione sua.


#Diegu Corràine

» in segus