bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


S'ONU reconnoschet su deretu de autodeterminatzione e indipendèntzia de Puerto Rico

In una risolutzione de su 19 de làmpadas presentada dae Cuba cun s'apoju de Bolìvia, Ecuador, Nicaràgua e Venezuela / 6 meses in antis de su referendum de santandria de su 2012 / Puerto Rico at a resessire a si fàghere indipendente dae Istados Unidos?

Su Comitadu de Decolonizatzione de s'ONU at aprovadu su 19 de làmpadas una risolutzione chi reconnoschet su deretu de autodeterminatzione e indipendèntzia de Puerto Rico, a chimbe meses dae su referendum non vinculante chi s'at a tzelebrare in s'ìsula caraìbica in su mese de 6 de santandria chi benit, pro istabilire su status polìticu e istitutzionale de Puerto Rico, ex colònia ispagnola ma como territòriu istadunidensu dae su 1898, in forma de commonwealth.

Su testu, presentadu dae Cuba cun s'apoju de Bolìvia, Ecuador, Nicaràgua e Venezuela, afirmat "su deretu inalienàbile de su pòpulu portoricanu a s'autodeterminatzione lìbera e a s'indipendèntzia" e cunfirmat chi Puerto Rico est "una natzione latinoamericana e caraìbica chi tenet s'identidade culturale sua incunfundìbile".

Su Comitadu Ispetziale de Decolonizatzione, presìdidu dae Ecuador, s'est incumandadu a sos IUA (Istados Unidos de Amèrica) pro "atzelerare unu protzessu chi permitat chi su popùlu de Puerto Rico àtuet su deretu suo a s'autoderminatzione lìbera e a s'indipendèntzia".

Custa petitzione at tentu finas s'agiudu de su Moimentu de sos Paisos No Alliniados (NOAL).

Est curiosu comente s'ONU afirmet deretos a autodeterminatzione e indipendèntzia a totus, francu a sas colònias internas de sos istados europeos, comente est sa Sardigna, sa Catalugna, su Friuli o àteros. Est semper sa matessi fiolera de sos "progressitas" de medas logos de su mundu, in favore de sos deretos universales, chi balent in totue, francu in Europa. Bastet de ammentare sa Decratzione Universale de sos Deretos de sos Pòpulos de Algeri (4-7-1976). Leghide mescamente sa setzione IV de sa Carta de Algeri (Deretos de sas Minorias) e bos nd'ais a abbigiare.

In sa foto, est faeddende su presidente de su Partido Independentista Puertorriqueño (PIP), Rubén Berríos Martínez. Su primu a manu manca, est Juan Dalmau Ramirez, segretàriu generale de su PIP e candidadu de su PIP a sa càrriga de guvernadore de Puerto Rico.


#Diegu Corràine

» in segus