bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


Puerto Rico: s'americanizatzione fortzada de sas iscolas proa generale de "fusione perfeta" cun sos IUA?

Su guvernadore portoricanu  Luis Fortuño cheret s'annessione a sos IUA e duncas est ammaniende s'americanizatzione de s'Ìsula.

S'ìsula de Puerto Rico, de unos 9000 km2 (pagu prus o mancu cantu sa Còrsica), cun 3928000 ab. est un'stadu "assotziadu" a sos Istados Unidos (IUA), a pustis de sa gherra intre Ispagna e IUA in su 1898. In pràtica est una colònia bera de IUA. Tenet comente limbas ufitziales s'inglesu e s'ispagnolu, faeddada dae s'96% de sos abitantes.
In su mese de santandria 2012 b'at a essere un'àteru referendum pro istabilire si mantènnere su status quo o s'integrare de su totu in sos Istados Unidos. Luis Fortuño [>], su governatore de su partidu in su podere (de su Partidu Nou Progressista ma finas membru de su Partidu republica de sos IUA) est già faghende proas generales de "fusione perfetta", a manera chi Puerto Rico devèngiat su 51 istados de sos IUA.
Duncas, intro de su 2020 cheret cunvertire sa populatzione portoricana a s'impreu esclusivu de s'inglesu. E tando su guvernu portoricanu at programadu de gastare 15 milliones de dòllaros pro nche pònnere s'inglesu in forma totale in 1.472 iscolas, cando chi finas a como sunt petzi 12! In pràtica si tratat de un'americanizatzione fortzada, chi sos portoricanos issèberent o nono de si "fùndere" in sos IUA.

Sena ispagnolu e cun s'americanizatzione totale, ite ostàculu bi podet abbarrere a s'integratzione totale cun IUA? Est pro custu chi est creschende sa contrariedade de setrores mannos de sas sotziedade portoricana.

Su partidu prus contràriu est su Partido Independentista Puertorriqueño. Juan Manuel Mercado, esponente de su PIP, narat a sa BBC chi sos abitantes de Puerto Rico s'intendent portoricanos e no istadunidensos: "Nois manifestamus sa portoricanidade nostra cada die cun sa limba nostra".
A su sòlitu sos polìticos de opositzione e sos intelletuales non s'oponent a sa presèntzia de s'inglesu in iscola, ma lu cherent comente limba istràngia. A pàrrere de Yolanda Izquierdo, diretora ad interim de su dipratimentu de Istùdios Ispànicos de s'Universidade de Puerto Rico, in un'intervista a sa BBC: "In custu paisu sa majoria de sa gente non faeddat in inglesu… Devet èssere optzionale… S'ispagnolu est semper istadu comente una genia de trintzea de resistèntzia a s'impositzione de una cultura chi est carculada comente istràngia".

Amus a bìdere comente at a andare su referendum dae inoghe a carchi mese. Nd'amus a faeddare torra in L&N.

De "fusione perfetta" nde cumprendimus meda fina nois Sardos, dae su 1847 a comò, pro non comprendere chi sa chistione de sa limba est fundamentu de s'identidade de unu pòpulu e chi s'assimilatzione linguìstica est sa premissa de s'assimilatzione natzionale.
Est possibile chi sos "indipendentista" sardo non si nd'abbigent?


#Diegu Corràine

» in segus