bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


Eletziones ispagnolas

S'avantzada de Amaiur

Su  PP at bintu in manera chi non b’at remèdiu in sas eletziones  generales de su binti de santandria coladu, cun una majoria assoluta de 186 iscannos, cando chi su PSOE est andadu a fundu cun su  peus resurtadu de s’istòria sua, falende a 110 deputados.
In  Euskadi, sa coalitzione abertzale ( “patriòtica”, in limba basca ) Amaiur est resurtada sa binchidora cun 7 iscannos, sighida  dae  PNV (5), sa  formatzione prus votada,  PSE (4) e PP (3). Duncas, sa manca abertzale est essida a campu cun fortza in  su Parlamentu, 15 annos a pustis, in sas primas votatziones dae cando est agabbada sa  violèntzia de s’ETA. Sa coalitzione Amaiur, sa cuntzentratzione prus manna e prus pluralìstica de fortzas indipendentistas e progressistas, at cunsighidu resurtados bonos a beru in custas eletziones generales.
At otentu sa rapresentàntzia in  sas bator provìntzias de Euskal Herria e,  in prus,  est sa  prima fortza in Gipuzcoa: in totu, como tenet sete deputados.
Amaiur otenet rapresentantes in totu sas  provìntzias, essende sa prima bia chi una candidadura de manca e abertzale lograt unu rapresentante in Araba. In custu “herrialde” (“regione”, in bascu) sas bator fortzas printzipales, PP, PSE, PNV e Amaiur, otenent unu rapresentante cada una, essende su PP su partidu prus votadu.
In Guipuzcoa Amaiur otenet tres de sos ses rapresentantes e est sa prima fortza, cun vantàgiu mannu subra de su segundu chi est su PNV.
In Bizkaia sa prima fortza est su PNV, chi otenet tres de sos oto rapresentantes; Amaiur, chi cunsòlidat su votu indipendentista,  est sa de tres fortzas in palas  de su PSE, ma otenet su matessi nùmeru de rapresentantes, duos.
In Nafarroa Amaiur at otentu unu deputadu e s’àtera fortza patriòtica chi si presentaiat in custa regione, Gero Bai, at otentu finas issa unu rapresentante; est sa prima bia chi duos deputados patriòticos ant a andare a Madrid a rapresentare sa Nafarroa.
Faghende una valutatzione prus generale de sos resurtados in Euskal Herria, sas duas formatziones ispagnolistas perdent ses de  sos deghessete postos de deputadu, e sos patriòticos brincant dae sete a trèighi. Una resessida manna a beru pro sos abertzales, mescamente si si pessat a su caràtere generale de custas eletziones.  A su sòlitu difatis, custa casta de eletziones no interessant meda s’eletoradu patriòticu,chi cussìderat su parlamentu  de Madrid una cosa a largu dae sos interessos suos.
Sas fortzas abertzales ant logradu un’egemonia crara in Bizkaia e Gipuzkoa, ant incurtziadu sas distàntzias in Araba e ant avantzadu meda in Nafarroa.
Custos resurtados cunfirmant chi sas istàntzias soveranistas e indipendentistas balàngiant tretu meda in s’issenàriu nou.
Amaiur est istada sa prima fortza patriòtica in su  cumplessu de Hego Euskal Herria.
Amaiur at postu in craru chi at a andare a Madrid a difèndere sos deretos de Euskal Herria e su deretu a detzìdere de sos tzitadinos suos.

[dae Eja, n. 7, 2011]

#Sarvadore Serra

» in segus