bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


ATACOS CONTRA A SAS COMUNIDADES CRISTIANAS DE IRÀK

Prus de 50 pessones mortas  |  Sunt minimende sos cristianos in s'Oriente Probianu  |  Sunt in aumentu in Israele

Sa comunidade cristiana de s'Iràk, bastante numerosa, in sas ùrtimas duas chidas est istada còrfida dae sa peus undada de violèntzia de sos ùrtimos annos, cun una sèrie de atentados contra a crèsias e bighinados de majoria cristiana in Bagdad chi at causadu prus de mesu chentina de mortos, mescamente tziviles cristianos, e deghinas de mortos. 

Custos atacos sunt cumintzados su 31 de santugaine cun sa leada de ostàgios dae parte de unu grupu de òmines armados in una catedrale de sa capitale irachena. Chimbantoto pessones aunt mortas pro s'atacu revindicadu dae s'Istadu Islàmicu de s'Iràk, una setzione locale –nant·chi– de Al-Qaida. 

Custu mèrcuris, sa violèntzia at sighidu in forma de atacos dinamitardos contra a bighinados cristianos de Bagdàd, chi ant provocadu non prus pagu de chimbe vìtimas mortales. 

Diat pàrrere chi custa sèrie de atacos rispondet a una minetza costante de Al-Qaida, chi at annuntziadu chi sas istitutziones e sa populatzione cristiana de totu s'Oriente Mèdiu sunt sos "obietivos suos legìtimos".  

Una de sas autoridades religiosas printzipales de sa comunidade cristiana, s'archipìscamu de sa Crèsia Ortodossa Sirìaca Athanasios Dawood at denuntziadu chi sos terroristas sun pratichende una 'pulisia ètnica' bera. At fatu una decraratzione, dae s'esìliu suo in Londra, a sos cristianos de s'Iràk:  "Sa populatzione cristiana devet lassare sa terra de sos mannos nostros e fuire dae sa pulisia ètinca premeditada". 

Su nùmeru de cristianos, difatis, est minimende a beru, membros medas de sa comunidade cristiana dae meda sunt sighende custu cussìgiu. In antis de s'invasione de sos Istados Unidos, si càrculat chi unos 800.000 cristianos istaiant in s'Iràk, una tzifra chi sete annos a pustis at minimadu a sos 500.000 o 600.000, a pàrrere de sos espertos. Comente resurtadu de s'aumentu de s'inseguresa –sos cristianos non fiant in perìgulu mannu suta de su règimene de Saddam Hussein– , prus e prus cristianos leant su caminu de s'esìliu. 

Diat pàrrere finas chi custu non siat unu fenòmenu esclusivu de s'Iràk,  ma de àteros paìsos dae su Lìbanu finas a s'Egitu, colende s'Iràn, chi registrant tendèntzias sìmiles. 

A su puntu chi. comente narat su giornalista Robert Fisk, "a pagu a pagu sa majoria mussulmana est creschende prus de sa populatzione cristiana in custos paìsos". "Est sa crònaca de una morte annuntziada", at cuncruidu su giornalista.

S'ùnicu logu in ue sos cristianos sunt in aumentu, ca sunt rispetados, est Israele.


#Diegu Corràine


» in segus