bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


B'at prus indipendentistas chi no unionistas in Iscòtzia

Sos chi cherent a s'ischirriare dae Londra sunt artiados a su 39%, cando chi sos contràrios sunt falados a su 38%

Pro sa prima bia  dae su  2008, su cunsensu  populare a s'indipendèntzia  de Iscòtzia est prus mannu de su disìgiu de abbarrare  in  su Rennu Unidu. A su chi resurtat dae un'istùdiu demoscòpicu  de s'istitutu  TNS-BMRB,  su 39% de sos iscotzesos sunt  in favore de s'ischirriòngiu dae Londra, cando chi  sos contràrios nche sunt falados a su 38%. Su càmbiu de tendèntzia  cuintzidet cun  sos primos meses de su guvernu iscotzesu nou, nàschidu a pustis chi sos eletores ant dadu  sa majoria assoluta a su Partidu Natzionale Iscotzesu (Scottish National Party, SNP) de su primu ministru atuale  Alex Salmond (in sa fotografia).

B'at duos datos  chi cherent leados in cunsideru. Su primu est  chi sos indetzisos arribbant a su 23%, una de sas tzifras  prus artas in custa casta  de istùdios demoscòpicos, chi in Iscòtzia, a su sòlitu,  mustrant opiniones  meda prus polarizadas. Su de duos  est chi sa tzifra  de sos chi sunt contra a  s'indipendèntzia  (38%) est una de sas prus bassas de totu s'istòria: in sos ùrtimos annos, pro nàrrere,  sos unionistas fiant semper subra  de su 40%, e a s'ispissu fiant intre su 50% e su 60%.

Custos datos non faghent ispantu si si pessat a sos resurtados de un'àteru istùdiu fatu in su mese de làmpadas.  In cussa ocasione sunt essidas a campu dua tendèntzias chi como parent cunfirmadas. A un'ala, s'indipendentismu s'est difusu meda in s'eletoradu de  Glasgow, sa tzitade prus manna de Iscòtzia (tocat a ammentare chi, in sas eletziones de maju, s'SNP est istadu su partidu prus votadu  in 5 de sas 8 tzircuscritziones de sa  metròpoli). A s'àtera, sos giòvanos sunt sos chi sunt prus in favore  a s'indipendèntzia, e custu aberit prospetivas bonas pro su tempus venidore.

De seguru custu b'intrat meda cun  sa crisi econòmica, chi nch'est giughende a minimare in manera manna a beru sos finantziamentos pùblicos:  a su sentimentu natzionalista istòricu de sos iscotzesos s'agiunghent sa discunfiàntzia e su discuntentu pro su guvernu de su Rennu Unidu, e, duncas, su disìgiu de si chircare unu caminu a contu issoro e de si guvernare  a sa sola.


#Sarvadore Serra

» in segus