bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


Unu regìmene de autoguvernu  chi lis permitat  de gestire sas richesas issoro

Lu pedint sos indìgenos de s'Astrintòrgiu de Torres

Sos prus pagu de  9.000 abitantes de duos munitzìpios de su nord estremu de s'Austràlia cherent  unu regìmene de autoguvernu  pro magonire sas siendas issoo;  cherent finas su podere de intervènnere in sos afares internatzionales chi los interessant . Est sa petitzione chi sos indìgenos  de s'Astrintòrgiu  de Torres (abitantes de unu grustu de ìsulas  chi s'agatant intre  s'ìsula-continente e Pàpua- Guinea Noa) ant presentadu a su guvernu  de Queensland, chi s'est inpinnadu  a l'istudiare  e a la propònnere  a sas autoridades  federales australianas de Canberra.

Sos duos munitzìpios  chi disìgiant de  si fàghere autònomos sunt sa Regione de sas Ìsulas de s'Astrintòrgiu de Torres e sa  Contea de Torres, ambos duos  apartenentes a s'Istadu  federadu de Queensland e ambos duos  formados dae ìsulas  in ue su prus  de sa populatzione apartenet a su pòpulu  indìgenu de sos isulanos  de s'Astrintòrgiu  de Torres. Su sìndigu de sa  Contea de Torres, Pedro Stephen, at leadu profetu  de sa vìsita de sa prima  ministra de Queensland, Anna Bligh, pro crarire sa cosa. Stephen diat chèrrere chi sos duos munitzìpios  si unant in unu territòriu autònomu cun poderes  de autoguvenu. Su sìndigu  at fatu s'esempru de Norfolk, un'ìsula chi faghet parte de s'Austràlia ma tenet unu guvernu e unu parlamentu suos.

Sa prima  ministra de Queensland at naradu chi est de acordu  a presentare sa proposta a su guvernu federale australianu. Semper e cando, at agiuntu Bligh, bi cheret unu "cunsensu" intre sos isulanos  e sos guvernos  de Queensland e  Austràlia pro mandare a dae in antis sa riforma. Stephen, pro contu suo, at pretzisadu chi s'autonomia si diat pòdere otènnere  sena  bisòngiu de s'ischirriare  dae Queensland.

 


#Sarvadore Serra

» in segus