ÀTERAS NATZIONES

Prus de 230 biddas indìgenas de su Brasile sunt istadas rapresentadas  in custas dies in un'acampada de protesta chi b'est istada in  Brasìlia pro pedire a su guvernu  de rispetare sos deretos issoro. Prus de 700 indìgenos bènnidos mescamente dae s'Amazònia ant protestadu contra a su distruimentu  de sos hàbitat issoro  pro neghe  de su fràigu  de infrastruturas, de sas digas, de sos  biocombustìbiles.

In su manifestu finale, sos indìgenos  assegurant chi "in dae in antis de su progetu de morte  de s'ofensiva de sos interessos de s'agrocummèrtziu, de su latifundu, de sos cunsòrtzios de impresas, de sas multinatzionales e de àteros poderes econòmicos e polìticos  subra de sas terras nostras, proclamamus sa determinatzione nostra  de difèndere sos deretos nostros, si b'at bisòngiu cun sa vida matessi". E agabbant afirmende chi non podent  atzetare "de sighire a èssere vìtimas  de su modellu neoliberale  de isvilupu  depredadore chi dòminat su mundu". S'acampada, chi si narat  "Terra Lìbera",  est una manifestatzione chi  sunt organizende dae  8 annos e servit, in prus de visibilizare sas problemàticas indìgenas  in sa capitale brasiliana, pro arresonare  e pònnere a cumone  propostas de defensa chi interessant totu sas comunidades.

Su Brasile in dae in antis de s'OEA

Sa chistione de sos pòpulos indìgenos de su Brasile  la sunt arresonende meda a beru, e su primu de abrile de ocannu   sa Cummissione Interamericana pro sos Deretos Umanos, organismu de s' Organizatzione de sos Istados Americanos,  at emìtidu una  mesura cautelare in ue at pedidu a su guvernu brasilianu  de Dilma Rousseff de arressare su megaprogetu de sa  diga idroelètrica de Belo Monte, pro arribbare  a un'acordu cun sas comunidades indìgenas. Sa risposta  de Rousseff est istada de abbandonare  sa Cummissione dae s'annu chi benit  e de annullare sa cuntributzione annuale de 800.000 dòllaros pro s'organismu.

Sa diga  de Belo Monte, situada in su riu Xingú (afluente de su riu de sas Amàzones), est su progetu idroelètricu prus mannu chi est realizende  in custu mamentu su guvernu brasilainu, e at a causare s'inundatzione  de 500 km2 de terras agrìculas e  forestales, medas de custas  abitadas dae su pòpulu Juruna. Dae su comintzu de su progetu, s'annu 1975, sunt costantes sas protestas de sa populatzione e sa solidaridade internatzionale.

Su problema de s'etanolu

Un'àteru de sos problemas chi interessant sas populatziones indìgenas  de su  Brasile est s'ispetzializatzione in su cultivu  de canna de tzùcaru pro  produire etanolu, mescamente pro òpera de s'impresa Cosan, marca de sa multinatzionale Shell in Brasile. Custu est finas  unu de sos puntos istratègicos de su guvernu brasilianu  in sa crèschida forte de s'economia chi est mandende a dae in antis. Su cultivu est faghende dannu mescamente a a sos apartenentes  su pòpulu Guaranì, ca nche los sunt boghende dae sas terras issoro.