bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


A agiuare sas limbas indìgenas de su Mèssicu

Ocannu b'at un'investimentu de 38 milliones de pesos

Cun  un'investimentu, ocannu, de 38 milliones de pesos, si cherent riscatare, agiuare e isvilupare sas limbas indìgenas de sa  Repùblica Messicana.

In un'addòviu cun sos giornalistas, Javier López Sánchez, diretore generale de s' Instituto Nacional de Lenguas Indígenas (INALI), at naradu chi pro annos sas limbas indìgenas sunt abbarradas sena carculadas e  minorizadas, ca bi fiat s'idea de amparare s'idioma ispagnolu ebbia. Petzi dae su  1992, at agiuntu, su  Mèssicu reconnoschet de èssere unu paisu pluriculturale e plurilinguista, finas tenende contu de su fatu chi “..a livellu mundiale s' Unesco at decraradu sa diversidade patrimòniu  de s'umanidade e sas limbas  indìgenas  patrimòniu immateriale de sos pòpulos chi las  faeddant”.

López Sánchez at craridu chi una de sas tareas prus de importu de s' INALI est a fàghere su Catàlogu de sas Limbas  Indìgenas Natzionales, pro cumprèndere a beru cantas limbas b'at in Mèssicu, cales sunt, in ue si faeddant, ite gramàtica tenent e  comente est giustu a las iscrìere, sena ismentigare su fatu chi limbas indìgenas medas sunt in perìgulu de estintzione.

S'àteru passu  est sa formatzione de intèrpretes e tradutores, pro fàghere bàlere  sa lege de sos deretos linguìsticos de sos pòpulos indìgenos, mescamente in sos tribunales in ue, a s'ispissu,  sas pessones sunt cundennadas dae un'interpretazione mala de sas allegas issoro.

In fines, su diretore de s'INALI at naradu chi est importante a promòvere s'impreu de custos idiomas cun libros, cartellos, nùmenes de carreras; isse  at fatu finas s'esempru  de unu radiuromanzu chi ant trasmìtidu  in limba tzotzi in  s'Istadu de su Chiapas, in ue b'est  sa populatzione indìgena prus numerosa,  in ue cada capìtulu lu lassaiant in suspesu  pro chi sos interessados aerent sighidu a ascurtare sa sèrie.


#Sarvadore Serra

» in segus