bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


ACPV a su Senadu ispagnolu

S'Istadu  devet  intervènnere  in favore  de TV3

Acció Cultural del País Valencià (ACPV) est un'assòtziu natzionalista  dedicadu  a s'istùdiu, a sa defensa e a su promovimentu de su patrimòniu culturale, artìsticu e naturale  de Catalugna in sa Comunidade Valentziana. Est nàschidu in Valèntzia in su 1978  e est ghiadu dae unu cussìgiu diretivu elèghidu  dae s'assemblea generale de sos sòtzios. Su presidente si narat Eliseu Climent (in sa fotografia).  Custu assòtziu est mere  de sos ripetidores  chi trasmitent  su sinnale de sa televisione de Catalugna in sa Comunidade Valentziana.

S'assòtziu ACPV s'est presentadu in su Senadu ispagnolu, in cara de sa Cummissione  Cultura in riunione plenària, pro pedire chi su  Parlamentu diat su permissu a sa discussione  de sa lege de initziativa populare "Televisione Sena Fronteras", chi at giai collidu  651.650 firmas. Eliseu Climent  at postu in sa mesa “sa realidade pluirilinguìstica de Ispagna e su pesu demogràficu de sa limba catalana", faghende riferimentu a sa Carta Europea de sas Limbas Regionales o Minoritàrias firmada dae su Guvernu , pro denuntziare  “ sa postura a un'ala chi sufrit sa limba in s'àmbitu de sa comunicatzione”.

Ammentemus chi, in su mese de freàrgiu de ocannu, sa rete autònoma catalana at interrutu sas trasmissiones in sa Comunidade valentziana. Finas a tando, aiat trasmissu sena pasu pro 25 annos.

Gasi at detzìdidu Ácció Cultural del País Valencià, chi utilizaiat sos ripetidores pro custa finalidade. Sa resone est s'incapatzidade  de parare fronte a sas multas impostas dae sa giunta de su Partido Popular presìdida dae Francisco Camps. A su chi narat  Catalunya Radio, finas a cussu mamentu aiant dèvidu pagare  unu totale de 700.000 èuros.

S'avogada  de ACPV, Mercè Teodoro, at postu in craru in s'auditzione (chi naschet dae un'initziativa  de su grupu de senadores de Entesa e de ERC) chi sunt sos  poderes pùblicos “sos chi si devent impinnare  pro chi totu sos tzitadinos  tengemus deretu a sa retziprotzidade e a unu cunsideru prus mannu  de sa limba nostra ”, e duncas s'Istadu  diat dèvere intervènnere  pro  “ risòlvere” sa situatzione  de sas trasmissiones  de TV3 in sa Comunidade.

Custu cunflitu si diat dèvere pònnere  “in manos” de s'Istadu, ca sas comunidades si sunt mustradas  “incumpetentes” a otènnere acordos  chi garantant sa retziprotzidade  e diant una solutzione giurìdica  a custa situatzione.

 


#Sarvadore Serra

» in segus