bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


Iscòtzia, sos natzionalistas otenent sa majoria assoluta in sas eletziones

In previsione  unu referendum pro s'indipendèntzia

Referendum pro s'indipendèntzia  a sas vistas  in Iscòtzia: su primu ministru natzionalista Alex Salmond (in sa fotografia)  at a pòdere mantènnere sa promissa  a pustis chi nch'at giutu su partidu suo a una vitòria estremorosa in sas eletziones. Su Scottish National Party (Snp) difatis at cunchistadu  sa majoria  assoluta de sos 129 deputados de Holyrood, s'assemblea de Edimburgu, crompende a su limenàrgiu de sos 65 iscannos, un'aumentu de 23 cunforma a su 2007.

Est sa prima bia  chi s'Snp podet guvernare  a sa sola  dae cando  su Parlamentu iscotzesu est nàschidu  in su 1999. Finas  a como aiat guvernadu  in coalitzione cun sos  laburistas  e sos  liberaldemocràticos, chi aiant frenadu s'imbèrghida de Salmond   cara a una autonomia semper prus manna  dae Londra . Como sos unos e sos àteros  ant tentu dannu mannu dae sa vitòria de   su Snp: finas Glasgow, dae semper unu fèudu laburista, est colada  suta de su controllu de sos natzionalistas . Iain Gray, su leader laburista in Iscòtzia, at dadu  sas dimissiones.

Su triunfu personale di Salmond, cunfirmadu primu ministru pro su de duos mandados  cun un'aumentu mannu  de sos cunsensos, aberit issenàrios noos  pro s'Iscòtzia  e ponet a beru in pessamentu  s'Inghilterra. Su referendum pro s'ischirriòngiu  dae Londra s'at a fàghere, at cunfirmadu  Salmond, in sa segunda medade  de sa legisladura chi at a durare chimbe annos. Pro parte sua,  su primu ministru britànnicu David Cameron at giuradu de difèndere su Rennu Unidu dae sas tendèntzias indipendentistas: «Si cherent unu referendum - at naradu  - deo apo a gherrare cun totu sas forzas meas pro mantènnere sa Gran Bretagna unida».

 


#Sarvadore Serra

» in segus