bandera infosar
Pro impreare sos Agregadores de Noas RSS, incarca s'icona cun su tastu de dereta de su sorighitu e, a pustis, seletziona 'Copia Indirizzo'. Pustis copiadu su collegamentu, incolla lu in s'agregadore tuo.

cumpartzi custa noa cun sos amigos tuos stampa

ÀTERAS NATZIONES


S'indipendèntzia de Catalugna.

In su referendum binchet su chi eja.

A fùrriu de su  90% de sos votantes de sa  consulta de eris  in Bartzellona ant naradu chi eja  a sa creatzione  de un'Istadu  catalanu indipendente. Est su resurtadu de s'ùrtimu de sos referendum chi ant fatu in Catalugna. Sa partetzipatzione  in Bartzellona  est arribbada a su  21,37% de s'eletoradu ufitziale  (18,14% si si cunsìderat  s'eletoradu  ampliadu a sos istràngios sena deretu de votu  e a sos giòvanos dae sos 16 a sos  17 annos). In totale, prus de 800.000 catalanos ant naradu chi eja a s'indipendèntzia, in prus  de 500 consultas populares dae su mese de cabudanni de su 2009.

"Mai, mancu in su bisu nostru prus remotu, diamus àere pòdidu imaginare unu resurtadu gasi", at naradu Alfred Bosch, su portaboghe  de Barcelona Decideix. In sas dies anteriores a sa votatzione, Barcelona Decideix aiat naradu   chi unu resurtadu chi nch'aeret coladu  su de sa consulta de Jordi Hereu subra de sa Diagonal (chi est istadu de su  12%) diat èssere istadu "una resessida". Su resurtadu finale  at belle duplicadu  su de su votu  chertu dae su sìndigu sotzialista. Sa resessida  de sa consulta si podet finas medire in su fatu  chi su presidente catalanu, Artur Mas, e sa majoria de sos cussigeris  de su guvernu suo  b'ant leadu parte.

Comente in medas  de sas consultas anteriores, sa de Bartzellona at finas tentu  su controllu de unu grupu de osservadores internatzionales.

Sa lege subra de s'indipendèntzia arribbat a su Parlamentu

Sa consulta bartzellonesa l'ant fata  tres dies in antis chi su  Parlamentu de Catalugna votet una lege a propòsitu de comente decrarare  s'indipendèntzia. Sa lege l'at  presentada Solidaritat Catalana per la Independència (SI). Est praticamente seguru  chi sa lege at a èssere botzada, ca tenet petzi s'amparu de 14 deputados (sos 10 de ERC, sos 3 de SI e su de Joan Laporta). Sos  62 deputados de Convergència i Unió insistent  chi como non tocat  a padire s'indipendèntzia, ma a negotziare  cun Madrid su patu  fiscale  e  sa gestione  de sas infrastruturas.


#Sarvadore Serra

» in segus