S'Itàlia: un'istadu plurilìngue
S'art. 6 de sa Costitutzione de sa Repùblica italiana decrarat chi "Sa Repùblica tutelat cun normas apòsitas sas minorias linguìsticas". A pustis de belle sessanta annos, cun sa Lege 482/99, custu artìculu est istadu atuadu. Duncas, pro s'art. 2 de sa 482 de su 1999, "In atuatzione de s'artìculu 6 de sa Costitutzione e in armonia cun sos printzìpios generales istabilidos dae sos organismos europeos e internatzionales, sa Repùblica tutelat sa limba e sa cultura de sas populatziones albanesas, catalanas, germànicas, gregas, islovenas e croatas e de sas chi faeddant su frantzesu, su francu-proventzale, su friulanu, su ladinu, s'otzitanu e su sardu."
In cantu a s'iscola, sa Lege previdet s'aprendimentu de sa limba e in sa limba minoritària in s'iscola de s'infàntzia, in s'iscola elementare e in s'iscola mèdia.

Sa Sardigna: un'ìsula cun chimbe limbas
Cun sa Lege 26 de su 1997, sa Sardigna reconnoschet e promovet sa limba sarda e, in prus, su gadduresu, su tataresu, s'aligheresu-catalanu, su tabarchinu, cadaunu in su territàriu suo.
S'iscola sarda, duncas, est una de sas protagonistas in sa renàschida de sas limbas faeddadas in Sardigna.

Sos Cuncursos, una forma moderna e amiga pro animare sos iscolanos e sos alunnos a s'impreu de sa limba.
In prus de s'aprendimentu curricolare de totu sas matèrias, sos Cuncursos de cada genia e argumentu podent agiuare sos iscolanos e sos maistros e professores a afrontare argumentos inerentes sas matèrias de istùdiu e finas fenòmenos e eventos de atualidade, in manera discansosa, moderna e amiga.
Su Cuncursu favorit sa curiosidade, sa chirca, sa manualidade, s'iscoberta de mundos noos. In prus, permitet de praticare sa limba sarda e sas àteras in manera creativa.
Pro custu sunt fundamentales in s'atividade iscolàstica e est fundamentale a bi leare parte cada bia chi si podet.