S'organizatzione Mèigos Sena Fronteras promovet una regorta internatzionale de firmas pro pedire a sa multinatzionale farmatzèutica Novartis de rinuntziare a s'atzione giuditziària contra a su Guvernu indianu.
In su 2005, s'Ìndia at promulgadu una lege subra de sos brevetos chi permitit sa produtzione de fàrmacos genèricos cun costos sustenìbiles, inclusas sas meighinas contra a s'Aids, e chi at cunsentidu s'atzessu a sas curas mèigas a milliones de pessones. Prus de su mesu de sos fàrmacos impreados pro sanare dae s'Aids in sos Paisos prus pòveros, chi tenent finas sa cantidade prus manna de malàidos, sunt produidos in Ìndia. Finas Mèigos Sena Fronteras curat s'80% de sos 80mìgia patzientes sieropositivos cun sos fàrmacos indianos.
Sas cumpangias farmatzèuticas chi tenent sa propiedade de sos brevetos subra de sos fàrmacos essentziales, comente sa Novartis, ponent in su mercadu meighinas cun costos proibitivos pro belle totu sas populatziones pòveras de su mundu chi non tenent sa possibilidade de si curare.
Pro defèndere sos brevetos issoro e sos balàngios meda mannos, 39 multinatzionales farmatzèuticas, intre custas sa Novartis, giai in su 1999 aiant intentadu una càusa giuditziària che a custa contra a su Sudàfrica e petzi sas protestas de s'opinione pùblica internatzionale e su carisma de Nelson Mandela aiant custrintu sas cumpangias a si ritirare dae su protzessu.
Pro custu, Mèigos Sena Fronteras pedit a s'opinione pùblica de totu su mundu de fàghere pressiones subra de sa Novartis pro otènnere chi su deretu a sa bida e a sas curas siat prus importante de sa tutela de sa propiedade intelletuale.

Pro nde ischire de prus e pro firmare sa petitzione: http://www.msf.it