Memòria istòrica de su sardu - 1
In sos ùrtimos trinta annos sa prosa in limba sarda at tentu un'isvilupu mannu a beru. Sunt essidos a campu rivistas, istùdios, romanzos e òperas de teatru. Cun custa sèrie chèrgio propònnere esempros de custa produtzione linguìstica chi, a dolu mannu, semus arrischende de nche pèrdere.
Nùgoro 7 de santandria 2009
Sarvadore Serra
Sa rivista Su Pòpulu Sardu est nàschida in sos annos ''70 comente giornale de su Moimentu de su Pòpulu Sardu e at sighidu a èssere publicada finas a su cumintzu de sos annos ''80. Inoghe bos propòngio un'artìculu de prima pàgina dedicadu a unu tema galu como de grandu atualidade: sas tzentrales nucleares. Est unu petzu, podimus nàrrere, ''militante'', cun un'istile giornalìsticu dèghidu. A dolu mannu, non s'ischit chie l'at iscritu, ca sos artìculos essiant a su sòlitu sena firma.
SU POPULU SARDU - Aprile 1978 - Annu 6 N. 3/4
NON CHERIMUS TZENTRALES NUCLEARES
Su guvernu italianu at detzisu de facher in Sardigna una tzentrale nucleare.
Totu custu l'aiat detzisu Andreotti e sos meres suos, sos americanes, in s'urtimu biazu chi custu at fatu in su Canada. Su guvernu italianu acollit custa detzisione de s'imperialismu e de sas multinassionales, ghetandenhoche una de custas tzentrales destruidoras.
Che a semper, sa rezone sarda at protestadu, ma petzi ca no los aian avertidos innantis. Ma como no est su de los averter o nono; dae su mese de nadale sos partidos de s'Intesa ischian zai totu, e su CIPE ischit chi sos guvernantes depen ponner in mente; in Casteddu bi sun po custu. Bisonzat de facher a manera chi custa tzentrale non si facat, e custu lu podet facher petzi su populu sardu cun s'organizatzione e sa gherra.
Custa tzentrale no la cherimus, siat pro sos dannos ecolozicos, ma su prus est ca s'Istadu italianu e sos amicos suos cheren distruer sas risorsas enerzeticas de s'isula nostra. Sas minas de carvone las tancan e las destruen, cando imbetzes si podiat ponner su carvone pro facher s'eletricu, pro facher medas cosas chi como si fachen dae su petroliu. Est chi s'istadu colunialista non cheret, a nos isvilupare cun sas risorsas enerzeticas chi nois tenimus (carvone, sole e bentos) pro travallare sos produtos nostros, chi las sichin a tzapare e bogare a fora.
Inntis cun s'emigrassione, apustis cun sas bases militares, infatu cun sas petrolchimicas e presones ispetziales, a su populu sardu l'an semper impostu sas detzisiones de s'Istadu colunialista chi at prozetadu sa fura de sas risorsas nostras, de sa terra, sa disocupassione e s'emigrassione.
Como cheren facher una tzentrale nucleare, chi at a dare a sos sardos s'incuinamentu radiativu e a sos meres s'eletricu. Cun sas tzentrales cheren destruer su deritu a s'esistentzia de su populu sardu.
Ma su populu sardu s'est semper bortadu contra a chie lu cheriat oprimire.
In Sardinna e in s'emigrassione sos travalladores nostros non s'acuntentan prus de custas puntas de billete e de telegramas, bonos pro cada cosa, e non si fachen cumbincher dae cussos partidos chi fachen sa finta de esser contra a s'opressione coluniale, cando sas cosas essin a campu craras craras, ma chi però sun amaiados a atzetare sas cosas chi in artu an detzisu: bastat a abadiare Sa Madalena. Su Moimentu de su Populu Sardu mutit totus a gherrare, in sas tzitades e in sas biddas, in sas iscolas e in sas frabicas e nat craru a su colunialismu: no amus a responder petzi a paraulas. Custa tzentrale non s'at a facher.
