S'Hymnu sardu nationale (s'Innu natzionale sardu) est istadu s'innu de su Regnu de Sardigna

Nche torrat a sos annos ''30 de su sèculu 19; l'aiat iscritu in limba sarda su preìderu (chi si fiat secularizadu in su 1842), Vitòriu Angius, diputadu in su Parlamentu Subalpinu, liberale fervorosu, cultore benemèritu de sas memòrias pàtrias chi nd'est testimòngiu su cuntributu suo mannu a beru a su Grande Dizionario Geografico, storico, statistico, commerciale degli stati S.M. il re di Sardegna monumentale de Casalis, in ue sa boghe Sardegna, chi òcupat sa bellesa de tres volùmenes, est opera sua. Sa mùsica, in càmbiu, l'aiat iscrita su maistru tataresu Giuanne Gonella (1804-1854), musicante de sa "Brigata Regina" e autore finas de sa mùsica de s'innu famadu Addio mia bella addio.

Sa prima esecutzione bi fiat istada in su Teatru Tzìvicu de Casteddu su 20 de freàrgiu de su 1844.

S'ispartidu originale l'at agatadu in s'archìviu de s'auditorium de Casteddu su professore Frantziscu Tzèsare Casula, diretore de s'Istitutu de istòria de s'Europa Mediterranea de su CNR.

A pàrrere de Casula, sos soberanos ant semper tentu s'innu in cunsideru mannu. S'ùrtima esecutzione ufitziale est istada in su 1937, dae bandas de su coru de sa Capella Sistina, diretore Lorenzo Perosi, pro disìgiu espressu de su re Vittorio Emanuele III , durante sa tzerimònia pro su cunferimentu de sa Rosa d'Oro a sa reina Elena dae bandas de Papa Pio XI.

In su 1991 S'Hymnu sardu nationale l'at eseguidu sa banda de sos Carabineris in su Quirinale su 29 de maju, in su cùmbidu traditzionale pro su corpus diplomàticu èsteru, comente omàgiu a sas orìgines tataresas de su Presidente de sa Repùblica Frantziscu Cossiga; l'ant torradu a sonare in su mamentu de sas dimissiones suas dae Capu de s'Istadu, su 28 de abrile de su 1992.

In su 2001 est istadu eseguidu, pro disponimentu suo, a s'interru de Maria Josè de Savoja, ùrtima reina de Itàlia

Custu est su testu de s'Innu