Contrariamente a su chi aìamus iscritu su 24 coladu, s'acordu intre Hamas e Fatah pro sa formatzione de unu guvernu de unidade natzionale est a largu galu dae èssere atuadu. Antis, sunt aumentende sas ocasiones de disacordu e de iscontru si est beru chi in sas ùrtimas bator dies, in Gaza e in Cisgiordània, b'at àpidu 28 mortos in sa "gherra" chi oponet sas organizatziones palestinesa prus mannas: sa prima, Hamas, chi cumandat su Guversu, sa segunda. Fatah, chi tenet Abu Mazen comente presidente de s'Autoridade palestinesa.
Ambas partes faghent apellos a pònnere a un'ala sas armas, ma in pràtica nemos ponet in mente.
Sùrtimu tentativu de pònnere sas paghes est de s'Aràbia saudita: domìniga sero at propostu una riunione de paghe in sa Meca, presièdida dae re Abdullah. Ma finas s'Egitu est chirchende de agiura sos Palestinos a si pònnere de acordu. [red]