Chenàbura mangianu, a ora de sas 11, in Istànbul, est istadu ochìidu Hrant Dink, de origine armena, connotu meda ca aiat semper criticadu su negatzionismu de s'istermìniu armenu de 90 annos como, ghiadu dae su Guvernu turcu de tando e mai reconnotu. Pro custu fiat istadu finas cundennadu in su 2005 a ses meses de presone, cunforme a s'art. 301 de su còdighe penale chi pessighit pro "atentadu a s'identidade turca" chie si siat chi faeddet de genotzìdiu de sos Armenos.
Dae annos fiat istadu minetzadu pro sas positziones suas e protzessadu prus de una bia. Sende chi s'atentadu mortale est istadu cundennadu dae su primu ministru turcu Erdogan, sunt in medas sos chi acusant sos setores prus de destra e antiarmenos de sa responsabilidade de sa morte: «In Turchia, b'at fascistas bastantes, macos, assassinos chi tenent sos ogros prenos de òdiu pro s'àteru», a su chi at naradu Ahmet Insel, diretore de sa rivista polìtica Birikim. E Ahmet Sever, presidente de su grupu de comunicatzione turcu cun s'Unione Europea, at decraradu chi «Si tratat de un'atentadu chi noghet a sa comunidade turca e armena e cumpromìtit finas sas relatziones cun s'Europa». Cun sas matessi acusa, nche fiant giai istados giutos a tribunale finas su prèmiu Nobel Orhan Pamuk e s'iscritora Elif Shafak.
Sa politzia est chirchende unu giòvanu de unos 18-20 annos, acusadu de èssere su mortore, cunforme a su chi mustrant telecàmeras postas a probe de su logu de su mortòrgiu, suta de sa sede de su giornale Agos. [red]