Su 11 de ghennàrgiu est cumintzada sa campagna de Amnesty International pro pedire a sas autoridades de sos Istados Unidos sa serrada de su tzentru de Guantánamo, in Cuba.
Dae su 11 de ghennàrgiu de su 2002, in su tzentru de detentzione gestidu dae sos Istados Unidos sunt istados trasferidos 775 presoneris de prus de 45 natzionalidades, oe 400 sunt galu in presone sena acusa nen protzessu.
«Sa detentzione issoro est illegale» at decraradu Irene Khan, segretària generale de Amnesty International. «Guantánamo est su tzentru de una rete de presones segretas e de trasferimentos illegales de presoneris chi sos Istados Unidos ant estesu a su mundu, cun sa cumplitzidade de àteros guvernos, inclùdidos sos europeos, de s'Oriente Mèdiu e de s'Àfrica de su Nord. Torturas, umiliatziones, discriminatzione e minisprètziu pro sos tratados internatzionales, belle semper in una cunditzione de impunidade, ant caraterizadu sos chimbe annos de s'istòria de Guantánamo».
Adesiones a sa campagna «Serrare Guantánamo, como!» sunt arribbadas dae tottu su mundu e manifestatziones de protesta sunt istadas fatas in Washington, Tokio, Tùnisi, Tel Aviv, Asunción, Londra, Madrid, Copenaghen, Parigi, Roma e in medas tzitades italianas.

Pro nde ischire de prus e pro firmare s'apellu in rete: http://www.amnesty.it/home/index.html