Pasca de Nadale.

Su tèrmine "Pasca" derivat dae s'aramàicu "Pascha" chi cheret nàrrere: passàgiu, liberatzione, festa nòdida annuale de sos Èbreos in ammentu de su passàgiu de su Mare Ruju, a pee, fuende dae s'Egitu. Pro sos Cristianos est sa festa de sa Resurretzione de Nostru Segnore, sa prima domìniga a pustis de su plenilùniu sighente a s'ecuinòtziu de beranu. In sardu est sa Pasca de Abrile

In limba nostra amus àteras Pascas: su bintichimbe de custu mese tzelebramus sa Pasca de Nadale. Nadale benit dae su latinu Natàlem, in relatzione cun su naschimentu de Nostru Segnore.

Su ses de ghennàrgiu est sa Pasca de sos tres Res (Epifania in italianu, dae su latinu Epiphanìa, aparitzione de s'astru chi dae oriente ghiat sos Tres Res a Betlemme. Chimbanta dies a pustis de Pasca de Abrile est sa Pasca Frorida o Pasca de Frores (in italianu est Pentecoste, dae su grecu Pentecôstê, chimbanta).