In ocasione de sa DIE INTERNATZIONALE DE SU LIBRU, proclamada dae s'Unesco, b'at àpidu sa Cunferèntzia LIMBA SARDA E LITERADURA. Belle 200 sunt istados sos istudentes de s'Istitutu Tècnicu industriale chi ant assìstidu a sa relatzione de s'iscritore Antoni Arca (in sa foto), catalanu de S'Alighera, e de Diegu Corràine, diretore de s'Ufìtziu de sa Limba Sarda, Ogiastra.
Arca at presentadu sa produtzione de prosa in sardu de sos ùrtimos 20 annos, mustrende sas cobertas de una chentina de libros publicados in sa limba nostra: romanzos e contos chi mustrant una vitalidade de sa limba, mancari siant pagos sos editores chi si dèdicant a publicare in sardu, mancari siat pagu s'interessu de sa Regione sarda chi, a pàrrere suo agiuat pagu a beru custa casta de produtzione editoriale. Arca at finas agiuntu chi est pagu o nudda s'interessu de sos mèdios de informatzione pro sa literadura sarda, cando chi dèdicant un'informatzione ispropositada a sa literadura in limba italiana, chi est sarda petzi pro s'ambientatzione.
Corràine at presentadu sas atividades de s'Ufìtziu de sa Limba Sarda in favore de s'impreu pùblicu de sa limba, cun campagnas de comunicatzione e sensibilizatzione in sardu. At afirmadu chi sa vitalidade de una limba b'est cando sa limba est presente, duncas "normale", in totu sos àmbitos e usos. E duncas cando no est presente petzi in libros de narrativa e de contos. E duncas finas in s'Iscola.
Ambos relatores ant insìstidu in su bisòngiu de isvilupare sa limba in su lèssicu e in sa terminologia pro l'addatare a sa modernidade e a faeddare de cada argumentu.
In ocasione de sa Die de su Libru, sos organizadores de s'addòviu, chi at tentu su patronadu de s'Iscola e de su Preside chi at abertu sos trabballos, ant finas premiadu 12 istudentes (de sos 190, in noe classes,  chi ant leadu parte a su Cuncursu internu de tradutzione de una parte de su discursu de Koichiro Matsuura dedicadu a s'Annu internatzionale de sas Limbas). Sos premiados de su Cuncursu, fatu finas gràtzias a s'agiudu de sos professores, sunt Isabella Bangoni, Marina Calzoni, Marta Usai, Federica Pusceddu, Erica Monni, Fabiola Casari, Luca Cavia, Andrea Piras, Alessandra Vitiello, Emanuele Mereu, Daniele Caredda, Davide Saul Leoni.
A pustis est istadu presentadu su Beranu Literàriu chi at a fàghere connòschere (dae su 5 de maju pro agabbare su 19 de làmpadas) sete romanzos in sardu, in sete biddas de Ogiastra, presente s'autore de cada libru.

Sa manifestatzione est istada organizada dae s' ULS - Ufìtziu de sa Limba Sarda / Provìntzia de Ogiastra, Assessoradu de sa Cultura, in intro de su Progetu de polìtica linguìstica IN SARDU, SA LIMBA NOSTRA.

..