[12-07-2006]

Gianni Pititu, giornalista numenadu e iscritore importante, at sighidu semper cun passione sos eventos de sa Barbàgia e at tentu s'oportunidade de nos pòdere contare cun connoschèntzia direta totu sa sotziedade e s'istòria de sa Sardigna de s'internu.

In custu libru, I misteri del Supramonte, isse nos contat su dramma de sos ùrtimos secuestros: vìtimas e parentes .

Su secuestru de persona est unu delitu chi at infamadu s'onore e s'istòria de sa comunidade sarda de s'internu ca non b'at àteru reatu prus malu e odiosu. E pro bonasorte, como semus unos cantos annos sena fàghere atos delincuentziales de cussa natura,  ma b'est istadu unu mamentu in ue cust'atividade fiat devènnida un'indùstria fiorente de rèdditos mannos pro tzertos ambientes cun resurtados distrutivos pro s'economia sarda de s'internu e de sa Sardigna in generale.

Pititu intrat in su corpus de su secuestru, dae sa fase de sa preparatzione finas a sa conclusione e esaminat  formas diferentes de tipologias e de cumportamentu de sos bandidos e de sos secuestrados chi variant dae tempus a tempus e sighint su cambiamentu de sa sotziedade: bastat a pessare petzi a su logu de sa presone chi in carchi mamentu at cambiadu dae sa gruta de sos montes nostros malos a connòschere  pro arribare finas a sas tendas de campègiu prus mòbiles  e malas a reconnòschere .

Cust'òpera est su resurtadu chi podet otènnere un'òmine chi connoschet bene su territòriu, sa gente e sas leges chi la guvernat. E totu custu est iscritu cun un'iscritura bella e prana chi petzi una pessone chi manìgiat cun naturalesa sas leges culturales de su giornalismu impignadu e de sa literatura sèria est a tretu de fàghere. [Barore Liori]