Autore : Salvatore Lai

Titulu : Amsicora

Editore : Amsicora Edizioni

Annu de publicatzione : 1993

Pag . 480

Salvatore Lai Deidda, desulesu de nàschida e de educatzione, finas a 18 annos at bìvidu a cuntatu cun su sartu finas a cando est resessidu a afrontare sos istùdios clàssicos e a sighire un'àtera esperièntzia, sa religiosa, chi l'at  leadu a  frecuentare sa facultade teològica de Napoli e a oteènere s'ordine satzerdotale  in Dèsulo, a 27 annos . Est mortu  giovaneddu, in su 1951, a s'edade de 30 annos.

Totus ischiant chi aiat lassadu un  poema inèditu in otavas dedicadu a su tentativu isfortunadu de Amsìcora de si rebellare a sa dominatzione romana.

S'òpera est essida a pìgiu cun sa pubblicatzione de su volùmene chi cuntenet sa presentada de Giulio Paulis e sa cura de Michele Congias, insegnante de Dèsulo, intelletuale sèriu e impignadu meda in sa sotziedade .

S'agatant in su poema elementos naturales de ambiente sardu chi faghent de isfundu a sa narratzione; sa passione eròica de su pòpulu sardu chi galu una borta cumbatit cun malasorte contra a s'agressione de sos pòpulos prus organizados e prus potentes in fortza militare; unu  sensu prufundu de apartenèntzia de sos cumbatentes a s'istòria e identidade comunas de su pòpulu; su cuntzetu culturale de Barbàgia e de Gennargentia bidu comente s'ùrtima barriera de libertade e de indipendèntzia.

Su poema est intituladu Amsìcora ma tenet comente sutatìtulu " Barbagia bella".

Sa variante impreada de sa limba est su logudoresu illustre, imposta dae su tonu èpicu e medas bortas finas cando sa limba espressat imàgines commoventes de s'ambiente naturale mantenet tonos artos e solennes .

Est naturale chi un'impresa culturale de custa portada custringat su poeta a impreare latinismos, italianismos e espressiones literàrias clàssicas e prèstidos carculados de sos maistros mannos de s'èpica antiga .

Cun totu cussu, s'òpera est moderna comente materiale culturale e comente tema tratadu ca est istada  cumposta a pustis de s'ùrtima gherra cando in Sardigna si faeddaiat de "Rinascita". In cussa diretzione si potet agatare unu rastu tzivile in s'ammentu de unu passadu de sa Sardigna prenu de gloòia e de isperu .

Ma de seguru àteras passiones de su poeta, a cuntatu diretu cun sa cultura clàssica, animaiant s'òpera e su coro suo .   (Barore Liori)