Editore: Giuffré editore

Data de pubblicatzione: 2003

ISBN :88  14  09992  8

Pàginas: 193

Preju: 18,00 èuros

Antonangelo Liori, nàschidu in Dèsulo ue at coladu sa pitzinnia e ue torrat semper pro amore de sa bidda e de sa gente, connoschet sa Barbagia che a pagos àteros. E de custu logu s'est semper interessadu cun istùdios prufundos, iscriende meda in libros e giornales fintzas a fàghere unu libru importante che  a custu cun s'istùdiu diretu fatu in su campu ue isvilupat argumentos giai individuados dae àteros istudiosos puru, chi a su tema ant dedicadu tempus, cultura e passione: s'ordinamentu giurìdicu de sa terra nostra e s'idea de sa giustìtzia in su mundu pastorale chi in Barbàgia s'espressat galu in bona parte cun  su deretu consuetudinàriu o mègius cun su còdighe de protzedura penale barbaritzinu.

Antonangelo Liori afirmat chi oe no esistit prus una sotziedade barbaritzina giurìdica orgànica ma custa s'est disunida in unu corpus cumpostu dae diferentes partes sotziales e una de custas partes si "definit issa etotu comente sotziedade. Si tratat de una sotziedade interpaisana de pastores barbaritzinos chi cumponent sa sotziedade de sos pastores barbaritzinos ". S'istùdiu est istadu fatu subra de un'intervista de pastores de 19 biddas provenientes dae sa Barbàgia de Ollolài, dae s'Ogiastra arta e dae sa Barbagia de Bervì. Pedire a sos pastores de sa Barbàgia rispostas subra de argumentos dìlicos no est fàtzile e de seguru no est istadu fàtzile mancu a s'autore chi at impreadu meda sa memòria e, ammentada sa cosa intesa,  l'at iscrita in su libru. Su chi faghet meravìgia, comente narat Liori, est ca custa sotziedade resistit a s'invasione de un'àtera cultura giurìdica ma sena l'ignorare. Su pastore sardu istùdiat su còdighe de s'istadu pro cumprendere totu sas diferèntzias mancari mantenet e preferit su suo e isse in sa consuetùdine s'agatat comente òmine e  mundu culturale ue est nàschidu e bìvidu. In   fines bessit a foras su raportu tra istadu e pòpulu e unu  còdighe beru de protzedura penale chi si definit comente unu mundu cun règulas suas chi bivet in unu cunfrontu continu cun sas règulas ufitziales de s'istadu e costituit galu una manera de pessare de una parte importante de sa sotziedade sarda.[Barore Liori]