[3-7-2006]

B'at un'iscritora, nàschida in Biddanoa ma trapiantada in Irlanda, chi no at ismentigadu s'ìsula de sa pitzinnia sua. Si narat Rina Brundu Eustace e in custas dies coladas est torrada a sa bidda sua pro sa festa de Santu Basile pro presentare s'ùrtimu traballu chi at fatu, su libru «Isole: scritture letterarie, momenti d'Ogliastra». Su libru est un'omàgiu a sa provìntzia nàschida como e a sa terra sua chi, mancari bivat a largu meda, issa ammentat semper cun istima manna. Rina Brundu definit s'òpera sua "Sa prima antologia de sa provìntzia noa de Ogiastra" e in intro de custa antologia issa bestit sos pannos de regista e dassat a sos autores de sos contos chi cumponent su libru, sa parte de protagonistas, francu pro un'artìculu iscritu dae issa matessi subra de Giovanna Mulas, iscritora nugoresa, chi bivet giai dae annos in Lanusè e chi s'autora descriet comente "unu pessonàgiu atìpicu de su panorama literàriu italianu".

Su libru est unu biàgiu in su tempus e in s'ispàtziu. Ma est finas un'invitu a si firmare a pessare torra a su tempus coladu, cussu antigu meda e cussu prus a curtzu. Gasi agatant logu in "Isole" un'istòria, contada dae Luciana Cannas, de s'alluvione chi su 6 de nadale de su 2004 aiat mortu duas pessones e destruidu domos e carreras in Biddamanna e Biddanoa.

In s'antologia, sunt tratados finas sos argumentos de sa limba sarda e sa provìntzia noa, de su disìgiu de autonomia de Biddanoa e de s'ammentu de un'isòperu de sos annos '50, trascritu in sardu dae sos pitzinnos de s'iscola mèdia, cun s'agiudu de su professore Salvatore Seoni.

Su libru de Rina Brundu, chi faghet tapa in su biàgiu suo finas in sas ìsulas de s'Irlanda e de sa Sitzìlia, est finas su resurtadu de sos ùrtimos duos annos de atividade in su situ ìnternet Terza Pàgina (atzessìbile tràmite www.villanovastrisaili.com). Dae annos issa poderat su cuntatu cun sa Sardigna e cun Biddanoa cun custu situ ammaniadu pròpiu cun s'iscola e cun sa collaboratzione de Salvatore Seoni. [bmr]

[>LA NUOVA]