S'iscritore libanesu Amin Malouf, presidente de su grupu de traballu subra de su diàlogu interculturale at presentadu s'istùdiu mustrende comente sa multiplitzidade de limbas diat pòdere cuntribuire a su cunsolidamentu de s'Europa, comete base pro sa riflessione de sas autoridades comunitàrias e istatales in initziativas legislativas futuras.
S'idea tzentrale de su docuemntu est chi sa UE e sos istados membros favorant in sos sistemas educativos issoro una "limba personale adotiva", comente at craridu Malouf in unu cunferèntzia istampa, paris cun su Cumissàriu europeu pro su Multilinguismu, su romenu Leonard Orban.
Cunforma a custa idea, cada tzitadinu europeu diat dèvere èssere animadu a isseberare in manera lìbera una limba distintiva, diferente dae sa limba identitària e dae sas limbas internatzionales de comunicatzione.
"Gasi comente la semus pessende, sa limba personale adotiva non diat èssere una segunda limba istràngia, ma una segunda limba materna" at naradu Malouf.
S'istùdiu cunfirmat  chi su de "Preservare totu sas limbas de su patrimòniu nostru, finas sas limbas antigas comente su gregu e su latinu, e favorire s'estensione issoro in su restu de su continente, finas sas limbas minoritàrias, sunt aspetos intrìnsecos de una Europa de paghe, cultura, universalidade e prosperidade".
Custu istùdiu de su grupu de inteleltuales, in ue est presente finas s'ipannolu Jorge Semprun, at a èssere sa base de su cunfrontu cun sos responsàbiles polìticos de sos istados membros de sa UE in sa cunferèntzia interministeriale subra de su multilinguismu de su 15 de freàrgiu in Bruxelles. [red]