Sàbadu 22 de cabudanni a sas 10:00, in su Palatzu Tzìvicu, ant a èssere intregados sos prèmios, un'istàtua de tzeràmica de s'artista Elio Pulli, a sos binchidores, pro fama nòdida, de sa prima editzione de su Città di Sassari, dedicadu a sas minorias linguìsticas. Sa cummissione, presièdida dae su sìndigu Gianfranco Ganau, fiat cumposta dae sos professores Lena Szilrad pro sos paisos islavos, Giuseppe Contu pro su mundu àrabu e sos paisos de su Mediterràneu, Michele Pinna pro sos autores de limba e literatura sarda, Aldo Morace pro sa literatura dialetale e sos iscritores migrantes, Giuseppe Serpillo pro s'àrea de sos paisos anglosàssones e tzèlticos. Sos premiados sunt: su regista egitzianu Youssef Shahine, fìgiu de libanesos, nàschidu in Alessàndria in su 1926, binchidore de un'Orsu de prata in su Festival de Berlinu de su 1978 e de su prèmiu a sa carriera in su Festival de Cannes de su 1997; s'iscritore irachenu Younis Tawfiq, nàschidu in Mosul in su 1957, residente in Itàlia dae su 1979 e presidente de su Tzentru Culturale ìtalu-àrabu Dar al Hikma; Oleksandr Irvanets, ucràinu, nàschidu in L'viv in su 1961, membru de s'assòtziu literàriu Bu-Ba-Bu, iscritore in poesia e in prosa e drammaturgu; Nuala Nì Dhomhnaill, poeta irlandesa nàschida in Inghilterra in su 1952, chi iscriet petzi in irlandesu, at bintu su prèmiu de Ireland Professor of Poetry in su 2001 e faghet parte de s'assòtziu Aos dàna, istituidu in su 1983; Ignazio Delogu, nàschidu in S'Alighera, poeta in sardu e italianu, binchidore de prèmios Ozieri e de su prèmiu natzionale de poesia G.Dessì e membru de sa cummissione regionale chi aiat elaboradu sa Limba Sarda Unificada. [gmr]