Su 24 de nadale, pro sa prima bia, su Tzentru de produtzione RAI de sa Sardigna at trasmìtidu sa noina de Pasca de Nadale. Ant amaniadu sa cosa sos giornalistas Romanu Cannas e Toninu Oppes, cun s'agiudu de sa Fondazione Sardinia. Sa funtzione l'at tzelebrada Don Màriu Cugusi in sa crèsia de su Santu Sepulcu de Casteddu. Durante sa missa est intervènnidu  s'istudiosu Bachis Bandinu, chi at faeddadu de sos raportos intre limba sarda e fide religiosa. At cantadu e sonadu, in mesu de sos àteros, su cantautore Piero Marras. In s'ìnteri de sa tzelebratzione m'apo ammentadu sa Cunferèntzia Internatzionale subra de Crèsia, limba sarda e limbas de àteras natzionalidades, chi sa Sotziedade pro sa Limba Sarda aiat organizadu in Aristanis in su lontanu  1987. A pustis de tantos annos, apo pessadu, tenimus unu resurtadu tangìbile e cuncretu. Isperemus chi sa cosa sigat e megioret.