Tradutzione: Fabrizio Ascari
Editore: Bompiani
Data de publicatzione: 2005
Collana: Tascabili Bompiani.
ISBN: 88-452-3448-7
Pàzinas: 159
Preju:  7,00 èuros

Dae unu mundu de atritos ideolòzicos a unu mundu de atritos identitàrios; sa chistione de s'identidade est de importu mannu e sa proposta chi nos faghet Amin Maalouf in custu libru est prus chi no àteru un'indicatzione subra de su caminu chi diamus poder pigare pro cumbater sa "Pantera identitària", comente la mutit s'autore matessi, in antis de nos nche mandigare.
In una sotziedade mundializada che a sa de oe, sa zente intendet semper prus, su bisonzu de marcare sas diferèntzias, e sa netzessidade de si reconnoscher in una Identidade ebia, ma cale?
Tocat de fagher s'Esàmene de Identidade pro agatare totu sos elementos de apartenèntzia, pro dimustrare chi s'Identidade de una pessone est fata non de unu ma de elementos meda; est una cosa chi nos distinghet, ca cadaunu est diferente dae s'àteru, e custos elementos tenent una zerarchia, chi podet cambiare segundu su mamentu, e càmbiat su modu de si cumportare. Si una pessone s'intendet minetzada pro un'apartenèntzia, est in cussa chi s'identìficat de prus e arribende finas a cumportamentos de intolleràntzia e suspetu chi podent amìntere cale si siat atzione. Pro ite pessones medas oe ochient sa zente in nùmene de s'identidade reliziosa, etnica, natzionale o de àteru importu? Isse faeddat de Contzetzione tribale, denùntziat sa manera de limitare s'identidade a un'apartenèntzia ebia.
Cun sa Mundialitztzione atzellerada, diamus dever pigare cussèntzia de unu destinu comunu e cumintzare a pessare a unu cuntzetu nou: s'apartenèntzia a una comunidade umana zenerale, sena no nche ismentigare de sos particulares; non devimus faeddare de tolleràntzia, non podet bastare, ca non devimus cuntzeder, ma cumprender e atzetare sa diversidade; devimus chircare un'ecuilìbriu intre sa diversidade de su mundu e sa netzessidade de Universalidade.
A s'agabu, s'autore ponet s'atzentu subra de s'importàntzia de sa Limba, chi cunsìderat una de sas apartenèntzias prus importantes ca podet esser siat elementu de identidade siat mèdiu de comunicatzione. Totu sas limbas tenent sa matessi dinnidade, de limbas si nde podent faeddare medas, e duncas, a su contràriu de su chi pessat pro sa Relizione, devet abarrare un'elementu identitàriu.

S'autore faghet una riflessione prufunda, argumentada cun riferimentos a s'istòria, sa filosofia e sa teolozia, tzitende esempros meda, finas personales, e impreende unu limbazu fàtzile, craru e iscurrèvole.



Amin Maalouf naschit in Beirut in su 1949, est un àrabu-cristianu. Su babu fiat iscritore e ziornalista e sa mama fiat de una famìlia Cristianu-maronita. Amin at frecuentadu un'iscola frantzesa de Zesuitas in Beirut e a pustis de aer fatu istùdios universitàrios in su campu de s'economia e de sa sotziolozia, at cumintzadu a traballare comente ziornalista; custu l'at permìtidu de s'interessare de polìtica internatzionale e de biazare in paisos medas comente inviadu: India, Bangladesh, Etiopia, Somàlia, Kenya, Yemen e Alzeria. Collaboradore de su cuotidianu libanesu "An-Nahar", in su 1976, cando sa gherra tzivile iscòpiat in Lìbanu, si nche tràmudat a Frantza, cun sa famìlia sua, in ie devenit redatore capu de "Jeune Afrique". Istat e traballat in Parizi.