Su mundu de s'informatzione oe
In su mundu de s'informatzione, in pabiru, in ràdiu e in televisione, sunt pagas sas ocasiones  e sas testadas chi favorint sa connoschèntzia de sos problemas de sas natziones e pòpulos "diferentes", in intro e in foras de s'Europa, francu cando b'at eventos clamorosos o graves. Sos utentes de custa informatzione, belle semper non tenent s'ocasione de cumprender, arrischende de si fagher petzi una bisione "negativa" o partziales de sas chistiones de atualidade: cunflitos, gherras, sutaisvilupu, culturas e sistemas sotziales diferentes. Ca belle mai sunt presentados sos problemas beros, sas càusas de sos eventos.
In prus, sas solutziones chi tenent custos problemas o sas propostas de solutzione non cumparent in s'informatzione currente, ca paga est s'informatzione chi dat "boghe" a sos àteros pòpulos e mundos.

Un'àtera informatzione est possìbile
Tempus Nostru  cheret proare a presentare in sardu sas informatziones chi a su sòlitu sos mèdias non proponent, sas informatziones e ideas chi essint dae sas fontes diretas espressadas dae sos protagonistas (àteros sitos de informatzione alternativa, organismos non guvernativos, assòtzios culturales de natzionalidades e pòpulos, entidades culturales natzionales e internatzionales).
Custu at a cunsentire finas de cumprender mezus sos problemas nostros e de tenner ideas noas pro otenner solutziones positivas.

TN: un'ocasione de cunfrontu e de afortimentu de sa limba sarda
Sas informatziones chi proponimus sunt unu mèdiu de introduire in su dibàtidu culturale e polìticu de s'Ìsula nostra elementos noos de cunfrontu, ampliende s'orizonte nostru. Sunt finas s'ocasione pro dare fortza a sa limba nostra, in manera sèria e moderna. Su sardu tenet totu sas calidades e possibilidades de lu fagher in manera cumpreta, che a totu sas àteras limbas chi si cherent populares e ufitziales in su matessi tempus.

---

>>>  Si cheres iscrier a TN, incarca inoghe REDATZIONE TN