Fàmene, povertade, maladias, gherras e violèntzia òcupant ispàtzios marginales in sos mèdias, comente dimustrat su raportu de Mèigos Sena Fronteras subra de sas crisis ismentigadas.

Pro su de tres annos cunsecutivos MSF, cun sa collaboratzione de s'Osservatòriu de Pavia, at analizadu s'ispàtziu chi sos mèdias ant dedicadu a sas crisis umanitàrias in su 2006. Sos datos cunfirmant chi sos mèdias italianos s'òcupant de cuntestos de crisis mescamente cando sunt ligados a fatos o pessones italianas e belle mai faghent connòschere sas cunditziones dramàticas de sas populatziones tziviles.

A sa tubercolosi, chi contàgiat 9 milliones de pessones e nde ochiet 2 milliones cada annu, sos telegiornales ant dedicadu in totu su 2006 3 noas. A sa malària, chi ochiet unu pitzinnu cada 30 secundos, 6 noas (però 4 fiant subra de sa morte de un'italianu chi fiat istadu contagiadu in Congo). In càmbiu, a s'influentza aviària, contada comente sa pandemia noa ma chi at registradu petzi 116 malàidos e 80 mortos, sos TG ant dedicadu 410 servìtzios.

Mèigos Sena Fronteras invitat totus a firmare sa cartulina eletrònica de sa campagna "Nara·mi de prus" chi a pustis at a èssere cunsinnada a sos diretores de su TG1, TG2, TG3, TG5, Studio Aperto, TG4, TGLA7, La Repubblica-Repubblica.it, Il Corriere Della Sera-Corriere.it, La Stampa, Il Sole 24 Ore e Il Messaggero.

Su raportu de MSF subra de s'informatzione italiana e sa cartulina de adesione a sa campagna sunt in sa pàgina http://www.msf.it/msfinforma/comunicati_stampa/14022007.shtml