[04 - 06 - 2006]

"Studiare in Sardegna" est su nùmene de su progetu chi at permìtere a 14 pitzinnos de orìgine sarda de colare un'annu in sas iscolas superiores de Casteddu imparende sa limba e sa cultura de s'Itàlia e de sa Regione nostra afortende sos ligàmenes cun s'ìsula. S'initziativa promòvida dae s'assessoradu regionale de su Traballu e dae su Cunvitu natzionale istatale Vittorio Emanuele II de Casteddu at a interessare sos residentes in sos paisos europeos in ue b'apat Tzìrculos e Assòtzios de sos emigrados: Bèlgiu, Frantza, Germània, Inghilterra, Olanda, Ispagna e Isvìtzera.
In s'annu iscolàsticu 2006-2007 ant a èssere dadas duncas 14 borsas de istùdiu: sos istudentes seletzionados ant a èssere ospitados in su Cunvitu natzionale o dae famìlias inditadas dae su matessi cunvitu. Sos pitzinnos chi ant a istudiare pro un'annu iscolàsticu (ma si previdet chi at a sighire pro àteros duos annos) in sas iscolas superiores de Casteddu, ant a pòdere frecuentare sos litzeos, sos istitutos tècnicos e sos professionales.
Pro ogni paisu europeu interessadu a su progetu ant a èssere leados duos istudentes (una pitzinna e unu pitzinnu) intre sos 14 e sos 17 annos chi connoscant unu pagu sa limba italiana.
Sas dimandas cherent presentadas (o imbiadas in racumandada a/r) intro de su 31 de trìulas de su 2006 a su Cunvitu Vittorio Emanuele II, carrera de Cesare Pintus 09100, Casteddu.
Su testu de su bandu de cuncursu si podet abaidare in su situ de sa Regione Sardigna. [spn]

[>www.agi.it]