[01-07-2006]

In cabudanni in sas iscolas italianas b'ant a èssere unos 500 mìgia pitzinnos sena sa tzitadinàntzia italiana. Sunt in aumentu sos alunnos de sas iscolas superiores, chi arribant a unos 100 mìgia, finas si sunt sas iscolas primàrias sas chi tenent prus istràngios. In s'annu iscolàsticu chi est finidu como, sos istudentes extracomunitàrios fiant unos 430 mìgia, cando deghe annos a oe fiant petzi 50 mìgia, difatis est pròpiu in custos ùrtimos annos chi est aumentadu su nùmeru de custos istudentes. In sos primos postos bi sunt sos pitzinnos albanesos, marochinos, rumenos e tzinesos, ma finas sos chi arribant dae sa ex Jugoslavia. Segundu cantu narat Vinicio Ongini, de s'ufìtziu pro s'integratzione de sos alunnos istràngios de su Ministèriu de s'istrutzione, in Itàlia s'est creende una situatzione diferente dae sa de su restu de s'Europa, e non petzi ca s'Italia est galu a su cumintzu in su caminu de sa multicultura, ma finas pro sa lestresa chi su Paisu nostru at tentu in custu àmbitu e pro sa variedade de sa gente istràngia. B'at prus de 180 logos dae ue arribant custos istudentes e s'area geogràfica cun sa pertzentuale prus arta de istudentes istràngios abarrat su Nord-Est. Intre sos 100 mìgia chi in cabudanni s'ant a iscrìere a sas superiores, s'80% at a isseberare sos istitutos tècnicos e professionales( in custas iscolas si prevident  allievos meda marochinos, cando sos pagos chi s'iscrient a sos litzeos sunt pitzinnos de s'est europeu). Su perìgulu, segundu Ongini, de custa situatzione est chi cando b'at  cuntzentratzione meda de immigrados in un'istitutu o in una matessi classe, si potzant creare iscolas-ghetto e duncas carteris-ghetto. Si si cunfrontat puru sa situatzione iscolàstica de sos italianos cun sa de sos istràngios, si bidet chi sos extracomunitàrios agatant in sas iscolas dificultades meda e chi su 25% de issos abbandonant sos istùdios.[len]

[>www.agi.it]