[19-06-2006]

Sos italianos sunt prus pagu istruidos chi non sos immigrados clandestinos. Est su datu chi essit a campu dae un'istùdiu de Carlo Devillanova, de s'Universidade Bocconi, e Tommaso Frattini, de su University College de Londra.

Sunt nùmeros galu prus importantes si cunfrontados cun sos datos de s'Ocse subra de s'istrutzione in su Paisu nostru: in sa classe de edade intre sos 25 e sos 64 annos, su 41,1% de sos immigrados narat de tènnere unu diploma de iscola mèdia superiore, contra a su 33% de sos italianos de sa matessi edade.

Su 12,1% de sos emigrados in Itàlia tenet un'istrutzione universitària. In fines, sas fèminas sunt a su sòlitu mègius chi non  sos òmines. Sos duos istudiosos ant fatu sa chirca issoro subra de deghemìgia clandestinos chi in 18 meses ant tentu assistèntzia dae su Naga de Milano, s'assòtziu de volontariadu chi dat assistèntzia sanitària de badas a sos immigrados irregulares.[lmr]